కరోనా వైరస్ విషయంలో అమెరికా చేస్తోన్న ఆరోపణలపై చైనా ప్రతిదాడికి దిగింది. వుహాన్ ల్యాబ్లో వైరస్ తయారుచేసినట్లు ఆధారాలు చూపెట్టాలని అమెరికా విదేశాంగ మంత్రి మైక్ పాంపియోకు సవాల్ విసిరింది.
"వుహాన్ ల్యాబ్ నుంచి కరోనా వైరస్ లీకయినట్లు తమ వద్ద ఆధారాలున్నాయని పాంపియో అన్నారు. అలాంటప్పుడు అవి మాకు చూపెట్టండి. ఎప్పుడు, ఎక్కడ, ఎలా జరిగిందో చెప్పాలి. కానీ ఆయన చూపెట్టలేరు. ఎందుకంటే ఆయన వద్ద ఏమీ లేవు. శాస్త్రవేత్తలు, నిపుణులకు సంబంధించిన విషయంలో రాజకీయ నాయకులు కలగజేసుకోకూడదు."
- హూయా చున్యింగ్, చైనా విదేశాంగ శాఖ అధికార ప్రతినిధి
ప్రపంచ ఆరోగ్య సంస్థ (డబ్ల్యూహెచ్ఓ) కూడా ఇదే చెప్పిందని చున్యింగ్ గుర్తుచేశారు. వుహాన్ ల్యాబ్కు సంబంధించి ఎటువంటి ఆధారాలు అమెరికా చూపెట్టలేదని డబ్ల్యూహెచ్ఓ చీఫ్ టెడ్రోస్ అన్నారని తెలిపారు. అమెరికాలోని శాస్త్రవేత్తలు కూడా ప్రకృతిలోనే వైరస్ పుట్టిందని చెబుతున్నారని గుర్తు చేశారు.
"అమెరికాలో గతేడాది అక్టోబర్లోనే కరోనా వైరస్ కేసు నమోదైనట్లు నివేదికలు చెబుతున్నాయి. ఫ్రాన్స్ నుంచి వచ్చిన నివేదిక ప్రకారం గతేడాది డిసెంబర్లోనే వైరస్ కేసు నమోదైంది. ఈ నేపథ్యంలో అన్ని దేశాలు 2019లో నమోదైన కేసులను తిరిగి పరిశీలించాలి.
అమెరికానే కొరియా, వియత్నాం యుద్ధాల్లో జీవాయుధాలను ఉపయోగించింది. ఈ దశాబ్ద కాలంలో అమెరికా జీవాయుధ నిబంధనలను ఉల్లంఘిస్తోంది."
- హుయా చున్యింగ్, చైనా విదేశాంగ శాఖ అధికార ప్రతినిధి
ట్రంప్ను ఇరకాటంలో పెట్టిన ఫౌచీ..
చైనాలోని వుహాన్ ల్యాబ్‌లోనే కరోనా పుట్టిందన్న ఆరోపణలతో అమెరికాలో కొవిడ్- 19 కార్యదళంలో కీలక సభ్యుడు, అంటువ్యాధుల నివారణ నిపుణుడు ఆంటోనీ ఫౌచీ విభేదించారు. ప్రముఖ ‘నేషనల్‌ జాగ్రఫీ’ ఛానెల్‌కు ఇచ్చిన ఇంటర్వ్యూలో ఆయన ఈ విషయాన్ని వెల్లడించారు.
వుహాన్ ల్యాబ్ నుంచే ఈ వైరస్ వచ్చిందనడానికి తమ వద్ద ఆధారాలు కూడా ఉన్నాయని అమెరికా అధ్యక్షుడు ట్రంప్, పాంపియో చెబుతున్న నేపథ్యంలో ఫౌచీ చేసిన వ్యాఖ్యలు ప్రాధాన్యం సంతరించుకున్నాయి. ఇవి ట్రంప్ను ఇరకాటంలో పెట్టేవే.
ఈ వైరస్ మానవసృష్టి అనడానికి ఎలాంటి శాస్త్రీయ ఆధారాలు లేవని ఫౌచీ స్పష్టం చేశారు. తొలుత ప్రకృతిలో ఉద్భవించిన ఈ మహమ్మారి క్రమంగా జీవుల్లోకి ప్రవేశించి ఉంటుందని అంచనా వేశారు. గబ్బిలాల్లో వైరస్ పరిణామక్రమాన్ని బట్టి చూస్తే ఈ విషయం స్పష్టమవుతుందని వివరించారు.
