కశ్మీర్ అంశంలో భారత్పై చైనా మరోసారి తన అక్కసు వెళ్లగక్కింది. జమ్ముకశ్మీర్‌కు ప్రత్యేకాధికారాలు కల్పించే ఆర్టికల్‌ 370 రద్దు తమ అంతర్గత వ్యవహారమని భారత్ ప్రకటించినా వక్రబుద్ధిని చాటుకుంది చైనా. ఈ అంశంపై ఐరాస భద్రతామండలిలో చర్చ జరగాలన్న పాకిస్థాన్ డిమాండ్‌కు డ్రాగన్ మద్దతు తెలిపింది.
ఈ మేరకు భద్రతామండలి అధ్యక్షుడిగా ఉన్న పోలాండ్ రాయబారికి చైనా ఇటీవల లేఖ రాసినట్లు ఐరాస రాయబారి తెలిపారు. అయితే ఇంకా తేదీ, సమయం ఖరారు చేయలేదని చెప్పారు. ఆర్టికల్‌ 370 రద్దుపై ఐరాసకు పాకిస్థాన్ రాసిన లేఖను ప్రస్తావించింది డ్రాగన్. ఆ విషయాన్ని భద్రతామండలి అజెండా ఐటంగా చేర్చాలని కోరినట్లు ఐరాస రాయబారి తెలిపారు.
చర్చ తేదీ, సమయం నిర్ణయించటానికి ముందు మండలిలోని ఇతర సభ్యదేశాలను సంప్రదించాల్సి ఉంటుందని ఐరాస రాయబారి చెప్పారు. ఈ అంశంపై రేపు చర్చ జరిగేందుకు అవకాశం ఉందని పేర్కొన్నారు.
పాక్ లేఖ
కశ్మీర్ స్వయంప్రతిపత్తి రద్దు విషయంలో ఐరాస అత్యవసరంగా సమావేశమయి చర్చించాల్సిన అవసరం ఉందని పోలాండ్ రాయబారికి ఇటీవల పాక్ లేఖ రాసింది. ఇదే విషయమై పాక్ విదేశాంగ మంత్రి మహమూద్ ఖురేషి చైనాలో పర్యటించారు. కశ్మీర్పై ఐరాసలో చర్చించేందుకు డ్రాగన్ మద్దతు కోరారు.
కశ్మీర్ విషయంలో భారత్తో పాక్ దౌత్య సంబంధాలు రద్దు చేసుకున్న తర్వాత జైశంకర్ చైనాలో పర్యటించారు. కశ్మీర్పై భారత్ నిర్ణయాన్ని చైనా వ్యతిరేకించింది.
ఇదీ చూడండి: కశ్మీర్కు ఈ పంద్రాగస్టు ఎంతో ప్రత్యేకం!
