చైనాలో దేశీయంగా అభివృద్ధి చేస్తున్న 16 కొవిడ్ టీకాల క్లినికల్ ప్రయోగాలకు.. ఆ దేశ ప్రభుత్వం ఆమోదం తెలిపింది. వాటిలో ఆరు టీకాలు.. మూడో దశ క్లినికల్ ట్రయల్స్లో ఉన్నట్లు అక్కడి మీడియా తెలిపింది.
ప్రొటీన్, అడినోవైరస్, న్యూక్లిక్ యాసిడ్, ఇన్ఫ్లూయెంజా సాంకేతికతతో ఈ టీకాలు అభివృద్ధి చేస్తున్నారని జిన్హువా వార్తా సంస్థ తెలిపింది.
చైనాలో ఇప్పటికే సినోఫామ్, సినోవాక్ బయోటెక్ అనే రెండు కొవిడ్ టీకాలకు షరుతులతో కూడిన అనుమతులు ఇచ్చింది అక్కడి ప్రభుత్వం. ఫిబ్రవరి 9 నాటికి 40.52 మిలియన్ల టీకా డోసులను అందించింది.
జులై చివరి నాటికి..
కొత్త రకం కరోనాతో అల్లాడుతున్న బ్రిటన్లో వ్యాక్సినేషన్ ప్రక్రియను వేగవంతం చేసేందుకు అక్కడి ప్రభుత్వం చర్యలు తీసుకుంటోంది. జులై 31 నాటికి దేశంలోని వయోజనులందరికీ టీకా మొదటి డోసు అందిస్తామని తెలిపింది.
యాభై ఏళ్ల వయస్సు పైబడినవారికి మే 1 లోపు టీకా వేయాలని బ్రిటన్ తొలుత లక్ష్యం నిర్దేశించుకోగా.. తాజాగా ఈ గడువును ఏప్రిల్ 15కు కుదిస్తూ నిర్ణయం తీసుకుంది. ఫైజర్, ఆస్ట్రాజెనెకా టీకాలను బ్రిటన్లో వినియోగిస్తున్నారు.
దేశ పౌరులందరికీ టీకా సరఫరా చేసే సామర్థ్యం తమకు ఉందని బ్రిటన్ ఆరోగ్య మంత్రి స్పష్టం చేశారు. బ్రిటన్లో డిసెంబర్ 8న వ్యాక్సినేషన్ ప్రారంభించగా ఇప్పటివరకు 1.72 కోట్ల మందికి మొదటి డోసు టీకా అందించింది. ఆ దేశంలో కరోనా ధాటికి ఇప్పటివరకు 1.2 లక్షల మంది ప్రాణాలు కోల్పోయారు.
ఇదీ చదవండి:భారత్ను ప్రశంసించిన ఐరాస చీఫ్
