లాక్డౌన్ ఎత్తివేసి ఆర్థిక వ్యవస్థను ఆదుకోవాలని చూస్తున్న దేశాలకు కరోనా సెగ పెరుగుతోంది. ఓవైపు కరోనాతో సహజీవనం కోసం అధికారులు ప్రణాళికలు రచిస్తుంటే.. వైరస్ మాత్రం తన ప్రతాపాన్ని చూపిస్తూనే ఉంది. ప్రపంచవ్యాప్తంగా ఇప్పటివరకు 58,14,687 కేసులు నమోదయ్యాయి. మొత్తం 3,47,979 మంది ప్రాణాలు కోల్పోయారు.
| దేశం | కేసులు | మృతులు |
| అమెరికా | 17,46,311 | 1,02,116 |
| బ్రెజిల్ | 4,14,661 | 25,697 |
| రష్యా | 3,79,051 | 4,142 |
| స్పెయిన్ | 2,83,849 | 27,118 |
| బ్రిటన్ | 2,67,240 | 37,460 |
| ఇటలీ | 2,31,139 | 33,072 |
| ఫ్రాన్స్ | 1,82,913 | 28,596 |
| జర్మనీ | 1,81,895 | 8,533 |
| టర్కీ | 1,59,798 | 4,541 |
రష్యాలో...
రష్యాలో కరోనా ఉద్ధృతి పెరిగింది. కేసులు విపరీతంగా పెరుగుతున్నాయి. మరణాల సంఖ్య 4 వేలు దాటింది. అయినప్పటికీ రష్యావ్యాప్తంగా ఆంక్షల సడలింపునకు శరవేగంగా పనులు జరుగుతున్నాయి. డీలా పడ్డ ఆర్థిక వ్యవస్థను ఎలాగైనా గాడినపెట్టాలని అధికారులు భావిస్తున్నారు.
రెండో ప్రపంచ యుద్ధంలో నాజీ ఓటమికి చిహ్నంగా మే9న వార్షికోత్సవం జరగాల్సి ఉంది. కరోనా సంక్షోభం దృష్ట్యా ఇది వాయిదా పడింది. తాజాగా.. ఈ 75వ వార్షికోత్సవ వేడుకను జూన్ 24న నిర్వహించనున్నట్టు అధ్యక్షుడు వ్లాదిమిర్ పుతిన్ తెలిపారు. వివిధ దేశాధినేతలకు ఆహ్వానాలు పంపించనున్నట్టు అధికారులు పేర్కొన్నారు.
తన రాజకీయ అజెండాలోని అత్యంత కీలకమైన రాజ్యాంగ సవరణపైనా దృష్టిసారించారు పుతిన్. ఏప్రిల్లో జరగాల్సిన ఓటింగ్ను కరోనా వల్ల నిలిపివేశారు. ఇప్పుడు దీనిని తిరిగి పట్టాలపైకి తీసుకురావాలని చూస్తున్నారు.
అమెరికాలో...
అమెరికాలోని లాస్వేగాస్ కాసినోలు, వాల్ట్ డీస్నీ వరల్డ్లు తిరిగి తెరుచుకోవడానికి సిద్ధమయ్యాయి. ఈ మేరకు ఇప్పటికే ప్రణాళికలు సిద్ధం చేసుకున్నాయి.
బీచ్లకు వెళ్లే ప్రజల సంఖ్య కూడా భారీగా పెరిగింది. వీరు ఎటువంటి నిబంధనలను పాటించడం లేదు. అందువల్ల.. కేసులు మళ్లీ పెరిగే అవకాశముందని నిపుణులు హెచ్చరిస్తున్నారు.
- వైరస్ను కట్టడి చేయడంలో విజయవంతమైన దక్షిణకొరియా.. ప్రపంచదేశాలకు ఆదర్శంగా నిలిచింది. అయితే అనూహ్య రీతిలో బుధవారం 40, గురువారం 79 కేసులు నమోదయ్యాయి.
- స్పెయిన్, ఇటలీలో రెండు నెలల కనిష్ఠానికి కేసుల సంఖ్య పడిపోయింది. దీనితో అక్కడి ప్రజలు ఊపిరిపీల్చుకుంటున్నారు. చైనాలో గురువారం కేవలం రెండు కేసులే నమోదయ్యాయి.
- న్యుజిల్యాండ్లో వరుసగా ఆరో రోజు ఎలాంటి కొత్త కేసులు వెలుగుచూడలేదు.
