భారత్లోని రెండు కీలక ప్రాజెక్టుల కోసం రుణాలు మంజూరు ప్రతిపాదనకు ఆమోదించింది బ్రిక్స్ దేశాల అభివృద్ధి బ్యాంకు(ఎన్డీబీ). ముంబయి మెట్రోకు 241 మిలియన్ డాలర్లు, దిల్లీ-గాజియాబాద్-మేరఠ్ మధ్య ప్రాంతీయ రాపిడ్ ట్రాన్సిట్ సిస్టమ్(ఆర్ఆర్టీఎస్) ప్రాజెక్టుకు 500 మిలియన్ డాలర్లు రుణాలు ఇవ్వనుంది. ఈ రుణాలకు ఎన్డీబీ బోర్డు అనుమతులు ఇచ్చినట్లు బ్యాంకు వెల్లడించింది.
ముంబయి మెట్రో రైల్-2 ప్రాజెక్టు కోసం అందించే 241 మిలియన్ డాలర్లను.. నగరంలో 14.47 కిలోమీటర్ల మెట్రో రైల్ లైన్-6 నిర్మాణానికి వినియోగించనున్నారు. ఈ లైన్ తూర్పు-పశ్చిమ ప్రాంతాలను కలపనుంది. ముంబయి ప్రజారవాణాలో ఈ లైన్ కీలక పాత్ర పోషించనుంది. ముంబయి మెట్రో ప్రాజెక్టులో సుమారు 58 కిలోమీటర్ల ( లైన్ 2, 7) మేర నిర్మాణం కోసం 2018, నవంబర్లో ఆర్థిక సాయం అందించింది ఎన్డీబీ.
దేశ రాజధాని దిల్లీ నుంచి ఉత్తర్ప్రదేశ్లోని గాజియాబాద్, మేరఠ్ను కలిపే రాపిడ్ రైల్ కారిడార్ నిర్మాణానికి ఎన్డీబీ 500 మిలియన్ డాలర్లను అందిస్తోంది. ఈ ఆర్ఆర్టీఎస్ ప్రాజెక్టు సుమారు 82.15 కిలోమీటర్లు పొడవు, 25 స్టేషన్లతో రూపొందనుంది. గంటకు 180 కిలోమీటర్ల మేర పరుగులు పెట్టే రైలుకు తగిన విధంగా ఈ ట్రాక్ను రూపొందిస్తున్నారు. దీని ద్వారా దిల్లీ నుంచి మేరఠ్కు చేరుకునే ప్రయాణ సమయం 60 నిమిషాల మేర తగ్గుతుంది.
ఇదీ చూడండి: కరోనాపై పోరులో భారత్కు ఎన్డీబీ భారీ సాయం
