ప్రముఖ అంటువ్యాధుల నిపుణులు డాక్టర్ ఆంథోని ఫౌచీని అగ్రరాజ్య ప్రధాన ఆరోగ్య సలహాదారుగా కొనసాగిస్తున్నట్లు ప్రకటించారు అమెరికా అధ్యక్ష ఎన్నికల విజేత జో బైడెన్. అలాగే.. కొవిడ్-19 సలహా బృందంలో సభ్యులుగా ఉంటారని చెప్పారు.
ఓ మీడియా ఛానల్కు ఇచ్చిన ఇంటర్వ్యూలో ఈ మేరకు వెల్లడించారు బైడెన్. ఆంథోనీ ఫౌచీతో మాట్లాడినట్లు తెలిపారు. ఏదైనా కరోనా వ్యాక్సిన్పై, వైరస్ను ఎదుర్కోవటానికి ఆర్థిక వ్యవస్థను మూసివేయాల్సిన అవసరం లేదని ప్రజల్లో విశ్వాసం కలిగించాల్సిన అవసరంపై చర్చించినట్లు చెప్పారు.
టీకా భద్రతను నిరూపించేందుకు తాను బహిరంగంగా తీసుకునేందుకు సిద్ధంగా ఉన్నట్లు పేర్కొన్నారు బైడెన్. అధ్యక్ష బాధ్యతలు చేపట్టేందుకు ఎదురుచూస్తున్నానని తెలిపారు.
100 రోజులు మాస్క్ ధరించాలని కొరతా..
అధ్యక్షుడిగా బాధ్యతలు చేపట్టిన తర్వాత తొలుత మాస్క్ ధరించటంపై దృష్టి సారించనున్నట్లు తెలిపారు జో బైడెన్. " పదవీ బాధ్యతలు చేపట్టిన తొలిరోజే.. 100 రోజుల పాటు మాస్క్ ధరించాలని కోరబోతున్నా. కేవలం వంద రోజులే, ఎప్పటికీ కాదు. దాంతో కేసుల్లో గణనీయమైన తగ్గుదలను చూస్తాం." అని పేర్కొన్నారు బైడెన్.
ఇదీ చూడండి: 'వచ్చే నెలలోనే అమెరికన్లకు కరోనా వ్యాక్సిన్'
