భారత్ బయోటెక్, ఐసీఎంఆర్ సంయుక్తంగా అభివృద్ధి చేసిన కరోనా టీకా కొవాగ్జిన్ను(covaxin latest news) ఆస్ట్రేలియా ప్రభుత్వం అధికారికంగా గుర్తించింది. ఈ టీకా రెండు డోసులు తీసుకున్న విదేశీ ప్రయాణికులకు తమదేశంలో ప్రవేశించేందుకు అనుమతి ఉందని తెలిపింది. ఈమేరకు ఆస్ట్రేలియా ఔషధ, వైద్య పరికరాల నియంత్రణ సంస్థ- థెరపీటిక్ గూడ్స్ అడ్మినిస్ట్రేషన్(TGA) అధికారిక ప్రకటనలో పేర్కొంది. ఆస్ట్రాజెనెకా అభివృద్ధి చేసిన కొవిషీల్డ్ టీకాను ఆస్ట్రేలియా ఇప్పటికే అధికారికంగా గుర్తించింది.
కరోనా వ్యాప్తిని తగ్గించే ప్రభావవంతమైన టీకాల అదనపు సమాచారాన్ని ఇటీవలే సేకరించింది టీజీఏ. ఈ వివరాలను పరిశీలించింన అనంతరం కొవాగ్జిన్(covaxin news), చైనా సినోఫార్మ్ అభివృద్ధి చేసిన బీబీఐబీపీ-కరోనా వ్యాక్సిన్లను అధికారికంగా గుర్తిస్తున్నట్లు తెలిపింది. ప్రయాణికుల వ్యాక్సిన్ స్టేటస్ను దృష్టిలో ఉంచుకునే ఈ నిర్ణయం తీసుకున్నట్లు చెప్పింది. ఇక నుంచి పూర్తి స్థాయిలో కొవాగ్జిన్ టీకా తీసుకున్న 12ఏళ్లు పైబడిన వారు, బీబీఐబీపీ టీకా తీసుకున్న 18-60 ఏళ్ల మధ్య వయస్సుల వారు ఆస్ట్రేలియా వెళ్లవచ్చు.
ఆ దేశాలు కూడా..
కొవాగ్జిన్కు మరో ఐదు దేశాలు కూడా అధికారిక గుర్తింపునిచ్చాయి. ఈస్టోనియా, కిర్గిస్థాన్, పాలెస్తీనా, మౌరిషస్, మంగోలియాలు గుర్తింపునిచ్చినట్టు భారత విదేశాంగశాఖ వెల్లడించింది.
కొవాగ్జిన్ టీకాను భారత్ సహా చాలా దేశాల్లో ఇప్పటికే వినియోగిస్తున్నారు. వ్యాక్సిన్ను డబ్ల్యూహెచ్ఓ అధికారికంగా ఆమోదించాల్సి ఉంది. త్వరలోనే ఈ ప్రక్రియ పూర్తి అయ్యే సూచనలు కన్పిస్తున్నాయి.
ఇదీ చదవండి: జపాన్లో అధికార పార్టీదే విజయం- ఆర్థిక విధానాలపై ప్రధాని కీలక వ్యాఖ్యలు
