భారత్-పాక్ మధ్య ప్రతిపాదిత కర్తార్పుర్ నడవా నిర్మాణ విషయమై ఇరుదేశాల ప్రతినిధి బృందాలు సమావేశమయ్యాయి. ఇరుదేశాల మధ్య ఉన్న సిక్కు పవిత్ర క్షేత్రాలను కలిపే కర్తార్పూర్ నడవాను తెరవాలని గత సంవత్సరం భారత్-పాక్ ఓ అంగీకారానికి వచ్చాయి. ఇందులో భాగంగా ఇవాళ భారత్లో వాఘా సరిహద్దు వద్ద దాయాది దేశాల రాయబారులు సమావేశమయ్యారు.
పాక్ విదేశాంగ మంత్రి అధికార ప్రతినిధి ముహమ్మద్ ఫైజల్ ఆధ్వర్యంలో పాక్ బృందం, భారత్ అధికారులతో చర్చలు జరిపింది. మైనారిటీల సంక్షేమానికి పాక్ ప్రాధాన్యంమిస్తోందని ఫైజల్ తెలిపారు. తదుపరి చర్చలు మార్చి 28న పాకిస్థాన్ ఇస్లామాబాద్లో జరుగనున్నాయి.
పంజాబ్ సరిహద్దు వెంబడి నిర్మిస్తోన్న ఈ నడవా (4.7 కిలోమీటర్లు) ఇరుదేశాలలోని సిక్కు పవిత్ర క్షేత్రాలను కలుపుతుంది. సిక్కు గురువు గురునానక్ దేవ్ 550 జయంతి (2019 నవంబర్) లోగా ఈ నడవా పూర్తి చేయాలని దాయాది దేశాలు భావిస్తున్నాయి.
భారత్ పంజాబ్లోని సిక్కు పవిత్ర క్షేత్రం 'డేరా బాబా నానక్ సాహెబ్', అలాగే పాకిస్థాన్ పంజాబ్లోని 'గురుద్వారా దర్బార్ సాహిబ్ కర్తార్పుర్' లను ఈ నడవా కలుపుతుంది. ఫలితంగా ఇరుదేశాల సిక్కు భక్తులు తమ పవిత్ర క్షేత్రాలను వీసా లేకుండా దర్శించడానికి మార్గం సుగమమవుతుంది.
శ్రమ తగ్గుతుంది...
ప్రస్తుతం భారత సిక్కులు బస్సులో లాహోర్ చేరుకుని అక్కడ నుంచి కర్తార్పుర్లోని పవిత్ర సిక్కు క్షేత్రానికి చేరుకుంటున్నారు. అంటే సుమారు 125 కిలోమీటర్లు ప్రయాణించాల్సి వస్తోంది. నిజానికి కేవలం 4.7 కిలోమీటర్ల దూరంలోని ఆ పవిత్ర దేవాలయాన్ని భారత దేశం నుంచి బైనాక్యులర్ ఉపయోగించి చూడవచ్చు. నడవా పూర్తయితే ఈ సమస్య తీరి ఇరుదేశాల భక్తులు పరస్పరం తమ పవిత్ర దేవాలయాలను సులభంగా దర్శించుకోవచ్చు.
పుల్వామా ఉగ్ర ఘటన నేపథ్యంలో ఈ కర్తార్పుర్ నడవా ఇరుదేశాల మధ్య నెలకొన్న ఉద్రిక్తతలను తగ్గించగలదని విశ్లేషకులు భావిస్తున్నారు.
