కాబుల్ అంతర్జాతీయ విమానాశ్రయం వద్ద(Kabul Airport) ఐసిస్-కె పన్నిన కుట్రను అమెరికా ఆదివారం భగ్నం చేసింది. ముష్కరుల వాహనంపై డ్రోన్ దాడి జరిపింది. అయితే.. ఈ దాడిలో చిన్నారులు సహా 10 మంది మృతి చెందారని స్థానికులు చెప్పినట్లుగా అఫ్గాన్ వార్తా సంస్థ టోలో న్యూస్ తెలిపింది.
కాబుల్ విమానాశ్రయం వద్ద గత గురువారం నరమేధానికి పాల్పడ్డ ఐఎస్‌ఐఎస్‌-కె ఉగ్ర సంస్థ ఆదివారం మరోసారి అలాంటి దాడికి వ్యూహరచన చేసిందని అమెరికా సెంట్రల్‌ కమాండ్‌ అధికార ప్రతినిధి కెప్టెన్‌ బిల్‌ అర్బన్‌ ఆదివారం తెలిపారు. ఆత్మాహుతి పేలుళ్లకు పాల్పడేందుకు ఓ వాహనంలో ముష్కరులు దూసుకురావడాన్ని తాము గుర్తించామన్నారు. డ్రోన్ దాడి ద్వారా వారిని హతమార్చామని చెప్పారు. డ్రోన్ దాడి అనంతరం భారీ పేలుళ్లు చోటుచేసుకున్నాయని.. వాహనం నిండా పేలుడు పదార్థాలు ఉన్నట్లు తద్వారా స్పష్టమవుతోందని వివరించారు.
