అఫ్గానిస్థాన్లో మరోసారి భద్రతా బలగాలే లక్ష్యంగా ఆత్మాహుతి దాడి జరిగింది. ఈ ఘటనలో ముగ్గురు పౌరులు మరణించినట్లు ఆదేశాధికారులు వెల్లడించారు. అఫ్గాన్ రాజధాని కాబూల్లోని దక్షిణ శివార్లలో జరిగిన ఈ దాడిలో మరో 15 మందికి గాయాలయ్యాయి.
ఈ దాడి తాలిబన్లే చేసినట్లు అఫ్గాన్ ప్రభుత్వం ఆరోపిస్తోంది. కాబూల్లోని ప్రత్యేక దళ శిబిరాన్ని అమెరికా బలగాల కమాండర్ సందర్శించిన మరుసటి రోజే.. అదే శిబిరం వెలుపల ఈ దాడి జరిగిందని తెలిపింది.
అమాయకులు బలి..
శిబిరంలో పనిచేస్తున్న గుత్తేదారులు.. లోనికి వస్తుండగా ఓ వ్యక్తి ఆత్మాహుతికి పాల్పడినట్లు అధికారులు చెబుతున్నారు. సైనిక శిబిరాన్ని లక్ష్యంగా చేసుకున్నప్పటికీ లోనికి రావడంలో విఫలమైన నేపథ్యంలో బయటే బాంబును పేల్చుకున్నట్లు అనుమానిస్తున్నారు. ఫలితంగా అమాయకులైన ప్రజలు బలయ్యారని అఫ్గాన్ హోంశాఖ ప్రతినిధి తారీఖ్ అరియాన్ వెల్లడించారు.
ఈ దాడి తాలిబన్లదేనా..
ఈ దాడిపై ఇంతవరకూ ఏ ఉగ్రసంస్థ బాధ్యత వహించలేదు. కానీ కాబూల్ ప్రాంతంలో తాలిబన్లు, ఇస్లామిక్ స్టేట్ ఆధిపత్యం కొనసాగుతోంది. తరచూ సైన్యం, పౌరులే లక్ష్యంగా దాడులు నిర్వహిస్తున్నాయి ఈ సంస్థలు.
అఫ్గాన్ నుంచి అమెరికా, నాటో దళాలను ఉపసంహరించుకుంటామని ప్రకటించిన తర్వాత కూడా తాలిబన్లు వరుసగా భద్రత సిబ్బందిపై దాడులు చేస్తూనే ఉన్నారు.
