కరోనా వైరస్ జనటిక్ వివరాలు ప్రపంచానికి చైనా చెప్పినప్పటి నుంచి మొదలైంది.. వ్యాక్సిన్ వేట. ప్రపంచదేశాల్లో పేరెన్నికగన్న పరిశోధనశాలలన్నీ తీవ్రంగా కృషి చేస్తున్నాయి. అయితే తొలుత అందరూ అసలు కరోనా వైరస్ పరీక్షల కోసం కిట్లు తయారు చేసే పనిలో పడ్డారు. కానీ అందరి అంతిమ లక్ష్యం ఒకటే... 'కరోనా వ్యాక్సిన్'.
ప్రపంచ ఆరోగ్య సంస్థ (డబ్ల్యూహెచ్ఓ) లెక్కల ప్రకారం దాదాపు 40 వ్యాక్సిన్ బృందాలు టీకా కోసం పనిచేస్తున్నాయి. అయితే ఏవీ ఇప్పటివరకు మనుషులపై పూర్తిగా ప్రయోగం చేసే స్థాయికి చేరుకోలేదు.
చైనా ముందడుగు...
చైనాకు చెందిన 'కేన్సైనో బయోలజిక్స్' లాన్సెట్ మెడికల్ జర్నల్లో తన ట్రయల్స్ గురించి ప్రచురించింది. హుబేయి రాష్ట్రంలో వందమంది ఆరోగ్యవంతుల మీద ఈ సంస్థ క్లినికల్ ట్రయల్స్ నిర్వహించింది. ప్రస్తుతం ఫేజ్-2లో అడుగుపెట్టింది.
ఈ సంస్థ తయారు చేస్తోన్న వ్యాక్సిన్ రోగ నిరోధక శక్తిని పెంచుతుంది. అయితే ఇది వైరస్ను ఎదుర్కొనేందుకు సరిపోతుందా అన్నదే ప్రశ్న.
28 రోజులపాటు వీరు చేసిన ప్రయోగంలో టీకా తీసుకున్నవారిలో యాంటీబాడీలు (ప్రతిరక్షకాలు) పెరిగాయి. అంతేకాదు వైరస్ల నుంచి కాపాడే టీ కణాల్లోనూ స్పందన కనిపించింది. కానీ కొద్దిపాటి నొప్పులు, అలసట, తలనొప్పి వంటి సైడ్ ఎఫెక్ట్లు వచ్చాయి.
ప్రస్తుతం చైనాలో ఈ వ్యాక్సిన్పై పెద్ద ఎత్తున పరీక్షలు నిర్వహిస్తున్నారు. కెనాడాలో 100 మందిపై ఈ వ్యాక్సిన్ ప్రయోగిస్తున్నారు.
ఆక్స్ఫర్డ్ (యూకే)...
కొవిడ్-19 వ్యాక్సిన్ అభివృద్ధిలో యూకేకు చెందిన ఆక్స్ఫర్డ్ విశ్వవిద్యాలయం చెప్పుకోదగ్గ ఫలితాలే సాధిస్తోంది.
గత నెలలో 1000 మంది వలంటీర్లపై ఆక్స్ఫర్డ్ శాస్త్రవేత్తలు ట్రయల్స్ నిర్వహించారు. బ్రిటన్వ్యాప్తంగా 10 వేల మందిపై వ్యాక్సిన్ ట్రయల్స్ నిర్వహిస్తామని గతవారం శాస్త్రవేత్తలు ప్రకటించారు. ఇందులో వృద్ధులు, చిన్నపిల్లల్నీ కూడా భాగం చేయనున్నారు.
ఇప్పటికే 400 మిలియన్ల వ్యాక్సిన్ డోసుల ఉత్పత్తి కోసం డ్రగ్ తయారీ సంస్థ ఆస్ట్రాజెన్కా... ఆక్స్ఫర్డ్తో ఒప్పందం కుదుర్చుకుంది. ఈ వ్యాక్సిన్ కోసం యూఎస్ బయోమెడికల్ అడ్వాన్స్డ్ రీసెర్చ్, డెవలప్మెంట్ అథారిటీ దాదాపు ఒక బిలియన్ యూఎస్ డాలర్లు సాయం చేస్తోంది.
ఈ ఏడాది చివరిలోగా వ్యాక్సిన్ను కనిపెట్టాలని సంస్థ లక్ష్యంగా పెట్టుకుంది. ఇప్పటికే ఫేజ్-3 ట్రయల్పై శాస్త్రవేత్తలు ప్రణాళికలు సిద్ధం చేశారు.
కేన్సైనో (చైనా), ఆక్స్ఫర్డ్ (యూకే) రెండూ వ్యాక్సిన్ ప్రక్రియలో ముందడుగు సాధించాయి. సార్క్-కొవ్-2ను ఎదుర్కొని నిలబడే రోగనిరోధక శక్తిపై కృషి చేస్తున్నాయి. మోడెర్నా వంటి ఇతర ఫార్మా సంస్థలు ఇతర పద్ధతుల్లో వ్యాక్సిన్ కనిపెట్టే ప్రయత్నాల్లో ఉన్నాయి.
అయితే ఇవ్వనీ చిన్న సూక్ష్మస్థాయి వైరస్ కణాలకు మన దేహం ఎలా ప్రతిస్పందిస్తుందో చూసి.. వ్యాక్సిన్ను తయారు చేస్తాయి.
ఇవి కాస్త భిన్నం...
కానీ ఎమ్ఆర్ఎన్ఏ వ్యాక్సిన్లో మాత్రం ఎలాంటి డిసీజ్ కాజింగ్ ఆర్గనిజమ్ ఉండదు. వైరస్ను ఎదుర్కొనేందుకు మన శరీరాన్నే దీటుగా తయారు చేస్తుంది. వైరస్ను గుర్తించి మన శరీరమే దానితో పోరాడేలా సిద్ధం చేస్తుంది.
ఐరోపా సమాఖ్య ఈ ఎమ్ఆర్ఎన్ఏ వ్యాక్సిన్ కోసం పెద్ద ఎత్తునే ఖర్చు పెడుతోంది. అయితే ఇలాంటి కొత్తరకం విధానాలతో ఫలితం రాబట్టాలంటే చాలా సవాళ్లు ఎదుర్కోక తప్పదని శాస్త్రవేత్తలు అంటున్నారు. అసలు ఈ వ్యాక్సిన్ ఫలితమిస్తుందా లేదా? అనేదే పెద్ద ప్రశ్న.
వీటికి వినియోగిస్తోన్న ప్రోటీన్లు వైరస్ను ఎదుర్కొనేందుకు సరిపోతాయా అనేది ఇంకో ప్రశ్న. అయితే ఒకవేళ ఈ పద్ధతిలో వ్యాక్సిన్ తయారైనా అది తాత్కాలికమే అవుతుందనే వాదన కూడా వినిపిస్తోంది.
లండన్ ఇంపీరియల్ కాలేజ్తో కలిసి ఐరోపా సంస్థలు ఈ విధానంలో వ్యాక్సిన్ కోసం కృషి చేస్తున్నాయి.
డీఎన్ఏ వ్యాక్సిన్...
ఇనోవియో సంస్థ డీఎన్ఏ వ్యాక్సిన్ కోసం పనిచేస్తోంది. సార్స్-కొవ్-2 ప్లాస్మిడ్ డీఎన్ఏను ఉపయోగించి ఈ సంస్థ టీకా కనిపెట్టేందుకు ప్రయోగాలు చేస్తోంది.
అయితే ఇప్పటివరకు ఎలాంటి విజయవంతమైన ఎమ్ఆర్ఎన్ఏ, డీఎన్ఏ వ్యాక్సిన్లు వాడుకలో లేవు.
చికిత్స వైపు చూపులు...
వ్యాక్సిన్ కష్టమని భావిస్తోన్న కొంతమంది కరోనా చికిత్స కోసం ప్రయత్నిస్తున్నారు. అమెరికా ఎమోరీ విశ్వవిద్యాలయం, మరికొంత మంది శాస్త్రవేత్తలు కనిపెట్టిన 'రెమ్దెసివిర్' డ్రగ్ను కరోనా చికిత్స కోసం వినియోగిస్తున్నారు.
ఇది కరోనా రాకుండా కాపాడలేదు కానీ.. వైరస్ లక్షణాలను తగ్గిస్తుందని ప్రాథమిక అధ్యయనంలో తేలింది. కరోనా రోగి ఆసుపత్రిలో ఉండే కాలాన్ని 31 శాతం ఈ డ్రగ్ తగ్గిస్తుందని మరో అధ్యయనం తేల్చింది. అయితే మరణాల రేటు తగ్గిస్తుందా అనేది తెలియదు.
రెమ్దెసివిర్ను ఉత్పత్తి చేస్తోన్న గిలీడ్ సంస్థ.. డ్రగ్ తయారీని డిసెంబర్ 1 నాటికి 10 లక్షలకు పెంచుతామని తెలిపింది. అయితే ఈ డ్రగ్కు ప్రపంచంలో ఇప్పటివరకు ఎలాంటి ఆమోదం లభించలేదు.
మరిన్ని...
ఇతర చికిత్స విధానాలను శాస్త్రవేత్తలు పరీక్షిస్తున్నారు. అందులో ప్లాస్మా చికిత్స ఒకటి. ఇది రోగనిరోధక శక్తిని పెంచుతుంది. టీబీకి వినియోగించిన పాత వ్యాక్సిన్ బీసీజీని శాస్త్రవేత్తలు పరీక్షిస్తున్నారు.
ఆస్ట్రేలియా, నెదర్ల్యాండ్స్లో ఇంకా వ్యాక్సిన్ కోసం అధ్యయనాలు జరుగుతున్నాయి.
అయితే వ్యాక్సిన్, చికిత్స విధానాల కోసం వేట కొనసాగుతూనే ఉంది. అయితే ఇవి ఎంతవరకు విజయవంతమవుతాయనేది వేచి చూడాలి.
- ఇదీ చూడండి: మరో భూగ్రహాన్ని కనుగొన్న శాస్త్రవేత్తలు!
