అఫ్గానిస్థాన్లో భద్రతా దళాలు, తాలిబన్లకు మధ్య భీకర ఘర్షణ జరిగింది. ఇరువర్గాల మధ్య జరిగిన కాల్పుల్లో 109 మంది తాలిబన్లు హతమయ్యారు. మరో 25మంది గాయపడ్డారు. ఈ మేరకు అఫ్గాన్ సైన్యం శనివారం ఓ ప్రకటన చేసింది.
రెండు రాష్ట్రాల్లో...
కందహార్ రాష్ట్రంలో జరిగిన ఘర్షణలో 70 మంది తాలిబన్లు మృతి చెందగా.. మరో 8 మంది గాయపడ్డారని అఫ్గాన్ సైన్యం చెప్పింది. పొరుగునే ఉన్న హెల్మాండ్ రాష్ట్రంలో జరిగిన ఘర్షణల్లో 39 మంది తాలిబన్లు హతమవగా.. 17మంది గాయపడ్డారని చెప్పింది. అఫ్గాన్ నేషనల్ డిఫెన్స్ అండ్ సెక్యూరిటీ ఫోర్సెస్(ఏఎన్డీఎస్ఎఫ్), అఫ్గాన్ వాయుసేన, పోలీసులు సంయుక్తంగా ఈ తాలిబన్ల ఏరివేత ఆపరేషన్ చేపట్టినట్లు అధికారులు తెలిపారు.
ఆ ఇద్దరూ హతం..
మరణించిన వారిలో.. ఇద్దరు కీలక తాలిబన్ నేతలైనా తాజ్గుల్, నెహమాన్ ఉన్నట్లు అధికార వర్గాలు చెప్పాయి. ఘటనాస్థలిలో భారీ స్థాయిలో పేలుడు పదార్థాలను, ఆయుధాలను అధికారులు స్వాధీనం చేసుకున్నారు. అయితే.. అఫ్గాన్ సైన్యం వైపు ఎందరు మరణించారన్న దానిపై స్పష్టత లేదు.
అమెరికా, నాటో దళాలు అఫ్గాన్ వీడుతున్న నేపథ్యంలో.. అక్కడ హింసాత్మక ఘటనలు చెలరేగుతున్నాయి. పరిస్థితిని అదుపులోకి తీసుకువచ్చేందుకు ఉగ్రవాదులపై భద్రతా బలగాలు ఉక్కుపాదం మోపుతున్నాయి.
ఇవీ చూడండి
