శనివారం జరిగిన రెండు వేర్వేరు ఘటనల్లో 18 మంది ప్రాణాలు కోల్పోయారు. చైనాలోని జాంగ్జౌ తీరంలో సముద్రంలో కొట్టుకుపోయి 10 మంది ప్రాణాలు కోల్పోగా.. టర్కీలో విమానం కూలి 8 మంది మృతిచెందారు.
చైనాలోని జాంగ్జౌ తీరంలో సముద్రం అలల ధాటికి 10 మంది బలయ్యారు. మరో ఆరుగురి పరిస్థితి విషమంగా ఉంది. ఈ విషయాన్ని స్థానిక మీడియా వెల్లడించింది.
చైనాలోని జియాంగ్కో గ్రామం సమీపంలో ఉన్న బీచ్ వద్ద ఆడుకుంటున్న వారిలో 17 మంది అలల ధాటికి కొట్టుకుపోయారు. వీరిలో 10 మంది ప్రాణాలు కోల్పోగా.. మరో ఆరుగురి పరిస్థితి విషమంగా ఉన్నట్లు అధికారులు పేర్కొన్నారు. మరొకరి ఆచూకీ తెలుసుకునేందుకు గాలింపు చర్యలను ముమ్మరం చేశారు. ఈ ఘటనకు మరింత సమాచారం కోసం దర్యాప్తు చేపడుతున్నామని అధికారులు స్పష్టం చేశారు.
టర్కీలో కూలిన విమానం..
దక్షిణ టర్కీ కాహ్రామన్మరాస్లోని పర్వత ప్రాంతాల్లో రష్యాకు చెందిన విమానం కుప్పకూలింది. ఈ ఘటనలో 8 మంది మృతిచెందారు. వీరిలో ఐదుగురు రష్యాకు చెందిన వారు కాగా మరో ముగ్గురు స్థానికులుగా అధికారులు గుర్తించారు. అగ్నిమాపక సేవలు అందించే ఈ విమానం మరికొద్ది సేపట్లో అదానా రాష్ట్రంలో ల్యాండ్ అవతుంది అనగా ఈ ప్రమాదం జరిగినట్లు స్థానిక మీడియా వెల్లడించింది. ఈ ఘటనపై దర్యాప్తు చేపట్టేందుకు ఘటనాస్థలానికి ప్రత్యేక బృందం చేరనుందని తెలిపింది.
ఈ ఘటనపై స్పందిస్తూ.. టర్కీ విదేశాంగ మంత్రి సంతాపం వ్యక్తం చేశారు.
ఇదీ చదవండి : భారత్ను పొగుడుతూనే.. మోదీ సర్కార్కు తాలిబన్ల హెచ్చరిక
