అగ్రరాజ్య 49వ ఉపాధ్యక్షురాలిగా ప్రమాణస్వీకారం చేసి చరిత్ర లిఖించారు భారత సంతతి కమలా హారిస్. ఈ సందర్భంగా ఆమె తన తల్లి దివంగత శ్యామలా గోపాలన్ను గుర్తు చేసుకున్నారు. తనపై, తన సోదరిపై తన తల్లి పెట్టుకున్న నమ్మకమే.. తనను ఈ స్థాయికి చేర్చిందని పేర్కొన్నారు. తమను ఎల్లప్పుడూ మొదటి స్థానంలోనే ఉండాలని ఆమె చెప్పేవారని తెలిపారు. ఆసియాన్, అమెరికాన్ ప్రమాణ స్వీకార కమిటీ, అమెరికా న్యాయవాద, రాజకీయ కార్యచరణ కమిటీ ఇంపాక్ట్ ఆధ్వర్యంలో వర్చువల్గా జరిగిన సమావేశంలో మాట్లాడారు.
"నా కథ లక్షలాది మంది అమెరికన్లది. భారత్ నుంచి మా అమ్మ శ్యామలా గోపాలన్.. అమెరికాకు వచ్చారు. ఆమె నన్ను, మా సోదరి మాయను ఎల్లప్పుడూ మొదటి స్థానంలోనే ఉండాలని చెప్పేవారు. చివర ఎప్పుడూ ఉండకూడదని బోధించారు. ఆమె మాపై ఉంచిన నమ్మకమే.. మాకు ఈ అవకాశాన్ని తెచ్చిపెట్టింది."
- కమలా హారిస్, అమెరికా ఉపాధ్యక్షురాలు
అమెరికా అధ్యక్షుడు జో బైడెన్తో కలిసి అమెరికా ప్రజల కలలను సాకారం చేసేందుకు ప్రయత్నిస్తానని కమలా హారిస్ చెప్పారు.
అమెరికా ఉపాధ్యక్ష పదవి చేపట్టిన తొలి నల్లజాతీయురాలిగా చరిత్రలో నిలిచారు 56ఏళ్ల కమల. ఈ పదవిని ఓ మహిళ చేపట్టడం కూడా ఇదే తొలిసారి. కమల తల్లిదండ్రులిద్దరూ అమెరికాకు వలస వెళ్లినవాళ్లే. ఆఫ్రికా మూలాలున్న తండ్రి డొనాల్డ్‌ హారిస్ జమైకా నుంచి వెళ్లారు. తల్లి శ్యామలా గోపాలన్ ఇండియా నుంచి 1958లో వలస వెళ్లారు.
బైడెన్ బృందంలో చేరే ముందు నుంచే కమలా హారిస్కు అమెరికా అధ్యక్ష హోదా అధికారాన్ని సాధించాలనే కలలు ఉండేవి. కానీ, ఆర్థిక పరిస్థితులు అనుకూలించక ఆ ప్రచారాన్ని మానేశారు. ఉపాధ్యక్షురాలిగా ప్రమాణ స్వీకారం కంటే ముందు కూడా తన తల్లిని గుర్తు చేసుకుంటూ ఓ ట్వీట్ చేశారు కమల. తాను ఈ స్థితిలో ఉండటానికి కారణం తన తల్లి అని పేర్కొన్నారు.
ఇదీ చూడండి:అగ్రరాజ్యంలో మెరిసిన భారతీయ కమలం
