కరోనా మహమ్మారి ధాటికి ప్రపంచ దేశాలు విలవిల్లాడుతున్నాయి. రోజు రోజుకు కేసుల సంఖ్య విపరీతంగా పెరిగిపోతోంది. ఆదివారం ఒక్కరోజే 1,89,000 కేసులు నమోదైనట్లు ప్రపంచ ఆరోగ్య సంస్థ (డబ్ల్యూహెచ్ఓ) తెలిపింది. ఒక్కరోజులో నమోదైన కేసుల సంఖ్యలో ఇదే అత్యధికమని ఆందోళన వ్యక్తం చేసింది. ప్రపంచవ్యాప్తంగా మొత్తం కేసుల సంఖ్య 1.02 కోట్లు దాటింది. మృతుల సంఖ్య 5 లక్షలకు పైనే ఉంది.
బ్రెజిల్ రికార్డు..
బ్రెజిల్లో కరోనా వైరస్ విజృంభిస్తోంది. ఒక్కరోజే రికార్డు స్థాయిలో 46,800 కేసులు నమోదయ్యాయి. ఒక్క రోజులో అత్యధిక కేసుల నమోదులో అమెరికా (44,400) రికార్డును బ్రెజిల్ దాటేసింది. బ్రెజిల్, అమెరికా తర్వాత.. కొత్త కేసుల నమోదులో భారత్ మూడో స్థానంలో ఉంది. భారత్లో రోజుకు సుమారు 20 వేల కొత్త కేసులు నమోదవుతున్నాయని డబ్ల్యూహెచ్ఓ తెలిపింది.
మళ్లీ విజృంభణ..
కేసులు, మరణాల సంఖ్యలో అమెరికా అగ్రస్థానంలో కొనసాగుతోంది. ఆ తర్వాత బ్రెజిల్, రష్యా, భారత్లు ఉన్నాయి. వైరస్ను కట్టడి చేయటంలో సఫలమైన చైనా, దక్షిణ కొరియా వంటి దేశాల్లో ఈ మహమ్మారి మళ్లీ విజృంభిస్తోంది.
ఇదీ చూడండి: ఒక్కరోజులో 19,459 కేసులు, 380 మరణాలు
