అమెరికా జరిపిన డ్రోన్ దాడుల్లో ఇరాన్ మిలటరీ కమాండర్ ఖాసీం సులేమానీ మరణించిన నేపథ్యంలో ఘటనపై ఐక్యరాజ్యసమితి ప్రకటన విడుదల చేసింది. గల్ఫ్లో మరో యుద్ధాన్ని ఈ ప్రపంచం భరించలేదని ఐరాస ప్రధాన కార్యదర్శి ఆంటోనియో గుటెరస్ వ్యాఖ్యానించారు. నాయకులంతా సంయమనం పాటించాల్సిన సమయమని గుటెరస్ అభిప్రాయపడ్డారు.
బాగ్దాద్ విమానాశ్రయంలో అమెరికా జరిపిన డ్రోన్ దాడితో ప్రపంచం ఉలిక్కిపడింది. ఈ ఘటనలో ఇరాన్ రెండో అత్యంత శక్తిమంతమైన నేత ఖాసీం సులేమాని మరణించారు. ఇరాన్ కుర్దు దళాలకు సులేమానీ నేతృత్వం వహిస్తున్నారు. సులేమానీ మృతితో ఇరాన్లో ఉద్రిక్తతలు చోటుచేసుకున్నాయి. అమెరికా అధ్యక్షుడు డొనాల్డ్ ట్రంప్ ప్రోద్బలంతోనే ఈ దాడి జరిగిందని విశ్లేషకులు అభిప్రాయపడుతున్నారు. ఈ నేపథ్యంలో ట్విట్టర్ వేదికగా ట్రంప్ స్పందించారు.
"జనరల్ ఖాసీం సులేమానీ ఎన్నో ఏళ్లుగా వేలాది మంది అమెరికన్లను పొట్టన పెట్టుకున్నారు. ఇంకా చాలా మందిని చంపేందుకు కుట్ర పన్నారు. లక్షలాది మంది ప్రజల మరణానికి సులేమానీ ప్రత్యక్షంగా, పరోక్షంగా కారణమయ్యారు. ఇటీవల ఇరాన్లోనే పెద్ద సంఖ్యలో నిరసనకారులను చంపేశారు."
-డొనాల్డ్ ట్రంప్, అమెరికా అధ్యక్షుడు.
సులేమానీని ఇరాన్ పౌరులు ద్వేషిస్తున్నారని ఈ విషయాన్ని అక్కడి నేతలు అంగీకరించడం లేదన్నారు. అతడిని ఎన్నో ఏళ్ల క్రితమే చంపేయాల్సిందని పేర్కొన్నారు.
ఇదీ చూడండి:జమ్ముకశ్మీర్లో పేలిన మందుపాతర... జవాన్లకు గాయాలు
