అమెరికా అధ్యక్ష ఎన్నికలకు సమయం దగ్గరపడుతోంది. అగ్రరాజ్యాధినేత ఎవరో నిర్ణయించే ఎన్నికలు నవంబర్ 3న జరగనున్నాయి. కరోనా నేపథ్యంలో ఈ ఏడాది మెయిల్-ఇన్ ఓటింగ్ వైపు ఎక్కువ మంది మొగ్గుచూపుతున్నట్లు గతంలో పలు నివేదికలు స్పష్టం చేశాయి. అయితే ఈ తరహా విధానంతో అవినీతి జరుగుతుందని ట్రంప్ ప్రభుత్వం భావించింది. ఫలితంగా మెయిల్ ఇన్ ఓటింగ్ విధానాల్లో మార్పులు చేసింది. దీంతో చాలా మంది ప్రత్యక్ష ఓటింగ్లో పాల్గొనే అవకాశాలు కనిపిస్తున్నాయి. వారంతా భారీ హాళ్లు, బహిరంగ ప్రదేశాలు, క్రీడా మైదానాల్లో ఓట్లు వేసేందుకు ఏర్పాట్లు చేస్తోంది ప్రభుత్వం.
తొలిసారి..?
నవంబర్లో ఓటింగ్ ఎప్పటిలా కాకుండా కాస్త విభిన్నంగా ఉండనుంది. ప్రతి రాష్ట్రంలోనూ మైదానాలు, సినిమా థియేటర్లలోనూ ప్రత్యక్షంగా ఓటు వేసేందుకు అవకాశం ఉంది. మెయిల్-ఇన్ బ్యాలెట్ల సేవలు ఎక్కువ మంది వినియోగిస్తే.. అవి లెక్కింపు సమయానికి చేరుతాయా? లేవా? అనే ఆందోళనల మధ్య ప్రభుత్వం ఈ సదుపాయాలు కల్పిస్తోంది. కెంటకీ, వెర్మౌంట్ ప్రాంతాల్లో పెళ్లి వేడుకల్లా బహిరంగ ప్రదేశాల్లో టెంట్లు వేసి ఓటింగ్కు ఏర్పాట్లు చేయనున్నారు. ఎన్బీఏ ఎరీనాల్లోనూ ఓటింగ్కు అవకాశం ఇవ్వనున్నారు. ఎక్కువ మంది ఓటర్లు వస్తే.. క్యూలో భౌతిక దూరం పాటిస్తూ నిల్చునేందుకు ప్రత్యేకంగా మార్కింగ్ చేయనున్నారు.
భౌతిక దూరం, మాస్కు ధరించడం వల్ల వ్యాధి వ్యాప్తిని అడ్డుకోవచ్చని ప్రభుత్వం భావిస్తోంది. అయితే చలికాలం కావడం వల్ల ప్రజలు బయటకు వస్తారా? అనేది ప్రశ్నార్థకం. దీని వల్ల సంప్రదాయ పోలింగ్కు ఓటర్లు తగ్గే అవకాశం ఉందని నిపుణులు భావిస్తున్నారు.
మెయిల్-ఇన్ ఓటింగ్..
ఎన్నికల రోజున మెయిల్-ఇన్ ఓటింగ్లో పెరుగుదల వస్తుందని అధికారులు అంచనా వేస్తున్నారు. అయితే ఈ అవకాశాన్ని ఎక్కువ మంది వినియోగించుకుంటే.. పోస్టల్ విభాగానికి తిప్పలు తప్పవని, కౌంటింగ్ సమయానికి బ్యాలెట్లు చేరడం కష్టమని అంటున్నారు.
వీటన్నింటి వల్ల ప్రత్యక్షంగా ఓటు వేయాలనుకునే వారూ పెరుగుతున్నారట. ఇప్పటికే ట్రంప్ కూడా మెయిల్-ఇన్ ఓటింగ్పై అవినీతి ఆరోపణలు చేశారు. అయితే కొన్ని రాష్ట్రాల్లో మాత్రం పూర్తిగా మెయిల్-ఇన్తోనే ఎన్నికలు నిర్వహించనున్నారు.
జూన్లో యూటా రాష్ట్రంలో ఎన్నికలు జరిగాయి. ఆ సమయంలో కరోనా వ్యాప్తి ఎక్కువగా ఉండటం వల్ల పోలింగ్ కేంద్రాలు తెరవలేదు. అయితే నవంబర్ ఎన్నికల్లో మాత్రం వాటిని అందుబాటులోకి తేనున్నారు. స్కూళ్లు, చర్చిలు, ప్రభుత్వ భవనాల్లో పోలింగ్ ఏర్పాట్లు చేస్తున్నారు. డ్రైవ్ థ్రూ, ఔట్ డోర్ పోలింగ్ విధానంలోనూ ఓటింగ్కు అవకాశం కల్పిస్తున్నారు.
కార్లలో వచ్చి ఓటింగ్(డ్రైవ్ థ్రూ)..
సబర్బన్ సాల్ట్ లేక్ సిటీలో... ఇండోర్ కన్వెన్షన్ సెంటర్లో 'డ్రైవ్ థ్రూ' పోలింగ్కు ఏర్పాట్లు చేస్తున్నారు. దీని ద్వారా కాలు కారులోంచి కింద పెట్టకుండానే ఓటు వేసి వెళ్లిపోవచ్చు. తొలుత కేంద్రంలోకి ప్రవేశించే ముందు బ్యాలెట్ను అందజేస్తారు. కారులో కూర్చొనే వాటిలో వివరాలు నింపి.. ఔట్డోర్ పార్కింగ్లో ఏర్పాటు చేసిన బాక్సుల్లో దాన్ని డ్రాప్ చేయాల్సి ఉంటుంది. లాస్ ఏంజిల్స్లోనూ డాడ్గర్ స్టేడియాన్ని పోలింగ్ కేంద్రంగా ఉపయోగించనున్నారు. ఎన్బీఏ స్టేడియాల్లో పలువురు ఆటగాళ్లు ఓటు హక్కు వినియోగించుకోనున్నారు.
నవంబర్ 3న జరగనున్న ఎన్నికల్లో ప్రస్తుత అధ్యక్షుడు, రిపబ్లికన్ అభ్యర్థి ట్రంప్, ప్రత్యర్థిగా డెమొక్రాట్ల అభ్యర్థి జో బైడెన్ పోటీపడనున్నారు. ఇప్పటికే ఇద్దరూ హోరాహోరీగా ప్రచారాల్లో బిజీగా ఉన్నారు.
