వాణిజ్య విమానాల స్థాయి వేగంతో నేలపైనే ప్రయాణించే రోజు రాబోతోంది. వినూత్న హైపర్లూప్ రావాణా వ్యవస్థను సాకారం చేసే దిశగా కీలక ముందడుగు పడింది. మనుషులను కూర్చోబెట్టి తొలిసారిగా నిర్వహించిన ప్రయోగం విజయవంతమైంది. అమెరికాలోని లాస్ వెగాస్లో ఉన్న డెవ్లూప్ ప్రయోగ కేంద్రంలో సోమవారం ఈ పరీక్ష జరిగింది.
వర్జిన్ హైపర్లూప్ సంస్థ ఈ ప్రయోగాన్ని నిర్వహించింది. ఇందులో భాగంగా సంస్థ అధికారులు జోష్ జీగెల్, సారా లుచియాన్లు కొత్తగా ఆవిష్కరించిన ఎక్స్పీ-2 హైపర్లూప్ పాడ్లో ప్రయాణించారు. ఆ వాహనం 15 సెకన్లలో 500 మీటర్లు దూసుకెళ్లింది. ఈ క్రమంలో గంటకు 172 కిలోమీటర్ల గరిష్ఠ వేగాన్ని అందుకుంది. ప్రయాణికుల సౌకర్యం, భద్రతను దృష్టిలో పెట్టుకొని ఎక్స్పీ-2 పాడ్ను ప్రత్యేకంగా రూపొందించారు.
హైపర్లూప్ పాడ్ను మానవులు లేకుండా దాదాపు 400 సార్లు పరీక్షించారు. తాజాగా ప్రయోగాన్ని స్వతంత్ర భద్రతా విశ్లేషకులు పరిశీలించారు. తదుపరి కూడా మానవ సహిత ప్రయోగాలు జరుగుతాయని వర్జిన్ సంస్థ తెలిపింది. ఈసారి జరిగే ప్రయాణంలో వర్జిన్ హైపర్లూప్ పవర్ ఎలక్ట్రానిక్స్ నిపుణుడు తనయ్ మంజ్రేకర్ పాల్గొంటారు. ఆయన స్వస్థలం పుణె.
ఏమిటీ హైపర్లూప్..?
హైపర్లూప్ అనేది కొత్త తరం రవాణా వ్యవస్థ. దీని ద్వారా గంటకు వెయ్యి కిలోమీటర్ల వేగంతో ప్రయాణించొచ్చు. అందులో మైట్రోరైలు బోగీల్లా ఉండే పాడ్లు లేదా క్యాప్స్యూల్స్ ఉంటాయి. తక్కువ పీడనం ఉన్న గొట్టాల్లో ఇవి పయనిస్తాయి. హైపర్లూప్ వ్యవస్థలను స్తంభాలపై కానీ భూగర్భంలో కానీ ఏర్పాటు చేయవచ్చు. ఈ వ్యవస్థ మొత్తం స్వయంచోదితం. డ్రైవర్ సంబంధ పొరపాట్లు ఉండవు.
భారత్కు ప్రయోజనం..
భారత్లోనూ హైపర్లూప్ ప్రయాణ వ్యవస్థ సాకారం కోసం కసరత్తు జరుగుతోంది. తాజా ప్రయోగం విజయవంతం కావడం.. ఈ ప్రాజెక్టులకు శుభవార్త అని వర్జిన్ హైపర్లూప్ పేర్కొంది.
"ప్రపంచంలోనే మొట్టమొదటిసారిగా ఇది భారత్లోనే సాకారం కావొచ్చు. పుణెను ముంబయితో అనుసంధానించేందుకు ప్రస్తుతమున్న ఎక్స్ప్రైస్ హైవే పక్కనే హైపర్లూప్ మార్గాన్ని ఏర్పాటు చేస్తాం" అని వర్జిన్ హైపర్లూప్ ఎండీ హర్జ్ ధలివాల్ పేర్కొన్నారు.
