భారత్లో నిషేధం ఎదుర్కొంటున్న టిక్టాక్ యాప్పై అమెరికా అధ్యక్షుడు డొనాల్డ్ ట్రంప్ మరో కీలక ప్రకటన చేశారు. టిక్టాక్ కొనుగోలు అంశంపై జరుగుతున్న చర్చలు సెప్టెంబర్ 15నాటికి పూర్తి కాకపోతే నిషేధం విధించాల్సి ఉంటుందని స్పష్టం చేశారు.
"ఒప్పందం కుదురుతుందని నేను భావిస్తున్నాను. ఒకవేళ మైక్రోసాఫ్ట్ గానీ మరేఇతర సంస్థ గానీ టిక్టాక్ను కొనుగోలు చేసేందుకు సరైన ఒప్పందం చేసుకోలేకపోతే సెప్టెంబర్ 15న మేం మూసేస్తాం. సరైన ఒప్పందం కుదిరితే అమెరికా ఖజానాకు చాలా డబ్బు వస్తుంది."
-డొనాల్డ్ ట్రంప్, అమెరికా అధ్యక్షుడు
అమెరికాలో టిక్టాక్ను బ్యాన్ చేసే యోచనలో ఉన్నట్లు ట్రంప్ ఇదివరకే ప్రకటించారు. దేశ భద్రత వంటి విషయాల్లో టిక్టాక్ ముప్పుగా పరిణమించిందనే ఆరోపణల మధ్య ఈ విషయంపై చర్చలు జరుపుతున్నారు ట్రంప్.
గడువు లోపే..
మరోవైపు.. మైక్రోసాఫ్ట్ సంస్థ టిక్టాక్ను కొనుగోలు చేసేందుకు ప్రయత్నాలు చేస్తోంది. అమెరికాలోని కార్యకలాపాలను సొంతం చేసుకునేందుకు టిక్టాక్ యాజమాన్యంతో చర్చలు జరుపుతోంది.
తాజాగా ఈ విషయంపై స్పందించిన మైక్రోసాఫ్ట్ సీఈఓ సత్య నాదేళ్ల... టిక్టాక్ కొనుగోలు అంశంపై అధ్యక్షుడు ట్రంప్తో మాట్లాడినట్లు తెలిపారు. ఈ చర్చలు సెప్టెంబర్ 15లోపే ముగుస్తాయని ఆశిస్తున్నట్లు తెలిపారు.
