న్యూక్లియర్ మిసైల్ స్థావరాలను చైనా విస్తరిస్తూ పెను ముప్పుగా మారుతోందని హెచ్చరించింది అమెరికా. ఇరు దేశాల మధ్య ఉద్రిక్తతలు కొనసాగుతున్న వేళ అణు క్షిపణులను ప్రయోగించేందుకు వీలుగా భూగర్భ స్థావరాలను నిర్మించటంపై ఆందోళన వ్యక్తం చేసింది.
పశ్చిమ చైనాలో కొత్త స్థావరాలను ఉపగ్రహం ద్వారా గుర్తించినట్లు అమెరికా శాస్త్రవేత్తల సమాఖ్యకు చెందిన పరిశోధకులు తెలిపారు. సుమారు 250 భూగర్భ మిసైల్ స్థావరాలు నిర్మాణంలో ఉన్నట్లు అంచనా వేశారు. ఈ అంశంపై వచ్చిన న్యూయార్క్ టైమ్స్ కథనాన్ని ట్వీట్ చేసింది అమెరికా స్ట్రాటజిక్ కమాండ్. ప్రపంచానికి ముప్పు పెరుగుతోందని ఆందోళన వ్యక్తం చేసింది.
చైనాలోని షింజియాంగ్ ప్రాంతంలో ఈ ఏడాది వేసవిలోనే రెండో స్థావరాన్ని గుర్తించారు పరిశోధకులు. గాన్సూ రాష్ట్రంలో నిర్మాణంలో ఉన్న మరో స్థావరాన్ని జూన్లో గుర్తించినట్లు కాలిఫోర్నియాలోని జేమ్స్ మార్టిన్ సెంటర్ ఫర్ నాన్ ప్రొలిఫరేషన్ స్టడీస్ పరిశోధకులు తెలిపారు. ఈ రెండు స్థావరాలు సుమారు 800 చదరపు కిలోమీటర్ల మేర ఉంటాయని చెప్పారు. భూగర్భ స్థావరాల్లో ఖండాంతర బాలిస్టిక్ క్షిపణులను మోహరించేందుకు వీలుంటుంది.
నో కామెంట్..
న్యూక్లియర్ మిసైల్ స్థావరాల విస్తరణ వార్తలపై గతంలో ఎలాంటి వ్యాఖ్యలు చేయలేదు చైనా. తాజాగా వచ్చిన వార్తలపై విలేకరులు ప్రశ్నించగా.. అక్కడి పరిస్థితులపై తమకు ఎలాంటి విషయాలు తెలియదని విదేశాంగ శాఖ పేర్కొనటం గమనార్హం.
గత దశాబ్ద కాలంలో అమెరికా, చైనా మధ్య సంబంధాలు దెబ్బతిన్నాయి. ఈ క్రమంలో చైనా అణ్వాయుధాలను సామర్థ్యాన్ని పెంచుకుంటున్నట్లు వస్తున్న వార్తలు ప్రాధాన్యం సంతరించుకున్నాయి. మరోవైపు.. దక్షిణ చైనా సముద్రం, తైవాన్ విషయంలో అమెరికా సైనిక ఘర్షణకు దిగే అవకాశం ఉందనే అంచనాలతోనే చైనా తన అణ్వాయుధ సామర్థ్యాన్ని పెంచుకుంటోందని నిపుణులు పేర్కొంటున్నారు.
తొలిస్థానంలో అమెరికా, రష్యా
ప్రపంచంలోనే అత్యధిక అణ్వాయుధాల స్థావరాలు కలిగిన దేశాల్లో అమెరికా, రష్యా తొలి స్థానంలో ఉన్నాయి. చైనాలో సుమారు 350 స్థావరాలు ఉంటాయని స్టాక్హోమ్ అంతర్జాతీయ శాంతి పరిశోధన సంస్థ అంచనా వేసింది. అమెరికా, రష్యా సుమారు 6వేల వరకు కలిగి ఉన్నట్లు తెలిపింది. గడిచిన 10 ఏళ్లలో చైనా తమ అణ్వాయుధ స్థావరాలను రెండింతలు పెంచిందని పెంటగాన్ పేర్కొంది.
ఇదీ చూడండి: అమెరికాకు హెచ్చరికగా చైనా క్షిపణి పరీక్ష!
