భారత్, ఇతర దేశాలకు టీకా తయారీలో అమెరికా అండగా ఉంటుందని అధ్యక్షుడు జో బైడెన్ అన్నారు. ప్రపంచవ్యాప్తంగా బిలియన్ల డోసులు అవసరం ఉన్నందున.. అగ్రరాజ్యం సుమారు 50కోట్ల డోసులు ఇవ్వడానికి కట్టుబడి ఉందని తెలిపారు.
"అర బిలియన్ డోసులను భారత్ సహ ప్రపంచ దేశాలకు ఇవ్వడానికి అమెరికా కట్టుబడి ఉంది. అంతేగాకుండా మరిన్ని డోసులు అందించేందుకు ప్రయత్నిస్తున్నాం. ఉత్పత్తి సామర్థ్యాలను పెంచేందుకు కూడా మేము సహాయసహకారాలు అందిస్తాం."
-జో బైడెన్, అమెరికా అధ్యక్షుడు
కొవాక్స్ కార్యక్రమం ద్వారా పేద దేశాలకు ఉచితంగా టీకా డోసులు అందిస్తామని బైడెన్ తెలిపారు. ఆగస్టు నెలాఖరు వరకు 100 పేద దేశాలకు మరో 5 లక్షల ఫైజర్ టీకాలను పంపించనున్నట్లు బైడెన్ పేర్కొన్నారు. సంక్షోభం నేపథ్యంలో ప్రపంచవ్యాప్తంగా అన్ని దేశాలకు వ్యాక్సిన్‌ను పంపిణీ చేస్తామని గతంలో అమెరికా హామీ ఇచ్చింది.
రూ. 37కోట్ల సేకరణకు భారత సంతతి డాక్టర్ల శ్రీకారం
భారత సంతతికి చెందిన అమెరికన్ డాక్టర్లు కరోనా రిలీఫ్లో భాగంగా సుమారు 37 కోట్ల రూపాయిలను సేకరించేందుకు సిద్ధమయ్యారు. ఈ మొత్తంతో 2,300 ఆక్సిజన్ కాన్సన్ట్రేటర్లు, 100 వెంటిలేటర్లు, 100 హై ఫ్లో నాసల్ మిషన్లను కొనుగోలు చేసి భారత్లోని 45 ఆసుపత్రులకు ఉచితంగా ఇవ్వనున్నట్లు ప్రవాస భారతీయుల వైద్యుల సంఘం పేర్కొంది.
ఇదీ చూడండి: ప్రపంచవ్యాప్తంగా 20 కోట్లు దాటిన కొవిడ్ కేసులు
