అమెరికా అధ్యక్ష ఎన్నికల్లో ప్రజలు ఇచ్చిన తీర్పును ఏ మాత్రం అంగీకరించలేకపోతున్నారు డొనాల్డ్ ట్రంప్. ఓటమిని ఒప్పుకునేందుకు ససేమిరా అంటున్నారు. ఇంకా ఓట్ల కౌంటింగ్ పూర్తి కాలేదని.. అన్ని ఓట్లు లెక్కించాక విజయం సాధించేది తానేనని ధీమా వ్యక్తం చేస్తున్నారు. బ్యాలెట్ ఓటింగ్ వ్యవస్థను సైతం ట్రంప్ ధూషించారు.
"న్యాయం మనవైపే ఉంది. మనం విజయం సాధిస్తాం.ఎన్నికల పూర్తి ఫలితాలు వచ్చేవారం వెలువడతాయి. మరోసారి అమెరికా గొప్పదేశమని నిరూపిద్దాం.''
---డొనాల్డ్ ట్రంప్, అమెరికా అధ్యక్షుడు.
మరో 45 ఎలక్టోరల్ ఓట్ల లెక్క తేలాల్సి ఉంది. పెన్సిల్వేనియా , జార్జియా, మిచిగాన్, నెవాడా, విస్కాన్సిన్ రాష్ట్రాల్లో మళ్లీ ఓట్లను లెక్కించాలని ట్రంప్ వర్గాలు కోర్టుల్లో పిటిషన్లు వేశాయి.
మొత్తం 538 ఎలక్టోరల్ ఓట్లకుగానూ 270 మార్కును అందుకుంటే విజయం సాధించినట్లే. ఇప్పటికే డెమొక్రాటిక్ అభ్యర్థి జో బైడెన్ 279 ఎలక్టోరల్ ఓట్లు సాధించారు. ట్రంప్ 214 వద్దే ఉన్నారు.
