అమెరికా అధ్యక్ష ఎన్నిక ఫలితాల లెక్కలు దాదాపుగా తేలాయి. ప్రెసిడెంట్ ఎలక్ట్ జో బైడెన్ శుక్రవారం.. ఆరిజోనాలో గెలుపొందారు. జార్జియాలో గెలుపునకు అతిసమీపంలో ఉన్నారు. ఫలితంగా ఈ డెమొక్రాట్ అభ్యర్థి ఎలక్టోరల్ ఓట్ల సంఖ్య 306కు చేరినట్లు అంచనా వేస్తున్నారు. నార్త్ కరోలినాలో విజయానికి దగ్గరైన ప్రస్తుత అధ్యక్షుడు, రిపబ్లికన్ అభ్యర్థి 232 వద్దే ఆగిపోనున్నారు.
ఈ మేరకు న్యూయార్క్ టైమ్స్, సీఎన్ఎన్, ఇతర వార్తాసంస్థలు నివేదించాయి. దాదాపు ఓట్ల లెక్కింపు పూర్తయిన వేళ.. ఫలితాలపై ఇలా అంచనాలు వేశాయి.
ఇవి అచ్చం 2016 అధ్యక్ష ఎన్నికలను ప్రతిబింబించినట్లుగా విశ్లేషకులు భావిస్తున్నారు. అప్పుడు డొనాల్డ్ ట్రంప్నకు 306.. డెమొక్రాట్ అభ్యర్థి హిల్లరీ క్లింటన్కు 232 ఎలక్టోరల్ ఓట్లు దక్కాయి. ఇప్పుడు కూడా అవే సంఖ్యలో ఎలక్టోరల్ ఓట్లు రావడం అరుదైన విషయం. కానీ ఫలితాలు మాత్రం తారుమారయ్యాయి.
ఇదీ చూడండి: 'ఈ ఎన్నికలు అమెరికా చరిత్రలోనే అత్యంత సురక్షితం'
క్లింటన్ తర్వాత బైడెనే..
2016లో ట్రంప్ నెగ్గిన జార్జియా, ఆరిజోనా, మిషిగన్, పెన్సిల్వేనియా, విస్కాన్సిన్ ఈసారి బైడెన్ వైపు మొగ్గడం విశేషం. 1992(బిల్ క్లింటన్) తర్వాత.. జార్జియాలో నెగ్గబోయే డెమొక్రాట్ అభ్యర్థి బైడెనే.
ట్రంప్ను ఓడించడం ద్వారా బైడెన్కు అమెరికా 46వ అధ్యక్షుడయ్యే అవకాశాలు పుష్కలంగా ఉన్నాయి. అయితే.. ట్రంప్ ఇంకా తన ఓటమిని అంగీకరించడం లేదు.
ఇదీ చూడండి: అమెరికా ఎన్నికలపై ఎట్టకేలకు స్పందించిన చైనా
