పెన్సిల్వేనియా కోర్టులో ట్రంప్​కు ఎదురుదెబ్బ

అమెరికా అధ్యక్ష ఫలితాలపై పోరాటం చేస్తున్న అధ్యక్షుడు డొనాల్డ్​ ట్రంప్​కు చుక్కెదురైంది. ఎన్నికల్లో అవకతవకలు జరిగాయంటూ పెన్సిల్వేనియా కోర్టులో పిటిషన్ దాఖలు చేశారు ట్రంప్​. ఈ వ్యాజ్యాన్ని విచారించిన ధర్మాసనం.. ట్రంప్​ పిటిషన్​ను కొట్టివేస్తున్నట్టు తీర్పు వెలువరించింది.

అమెరికా అధ్యక్షుడు డొనాల్ట్​ ట్రంప్​నకు పెన్సిల్వేనియా ఫెడరల్​ కోర్టులో ఎదురుదెబ్బ తగిలింది. పెన్సిల్వేనియాలో పోలైన ఓట్లను పరిగణలోకి తీసుకోరాదని ట్రంప్​ వేసిన వ్యాజ్యాన్ని ఫెడరల్ అప్పీల్​​ కోర్టు తిరస్కరించింది. ఎన్నికల్లో అవకతవకలు జరిగాయంటూ ట్రంప్​ వేసిన పిటిషన్​పై విచారణ చేపట్టిన ముగ్గురు న్యాయమూర్తులతో కూడిన ధర్మాసనం.. శుక్రవారం ఇచ్చిన తీర్పును సమర్థించింది. స్వేచ్ఛాయుతమైన ఈ ఎన్నికలు ప్రజాస్వామ్యానికి జీవనాడి వంటివని న్యాయమూర్తి స్టెఫానొస్​ బిబాస్​ పేర్కొన్నారు. ఈ విషయాన్ని తీవ్రంగా పరిగణించిన కోర్టు.. ఎన్నికల్లో అవకతవకలు జరిగాయనే ఆరోపణలకు రుజువులేవని ప్రశ్నించింది.

నవంబర్​ 3న జరిగిన అగ్రరాజ్య అధ్యక్ష ఎన్నికల్లో పెన్సిల్వేనియాలో ట్రంప్​పై.. డెమొక్రాటిక్​ అభ్యర్థి జో బైడెన్​ గెలుపొందారు. పెన్సిల్వేనియా సహా మిషిగాన్​, విస్కాన్సిన్​ల్లోనూ​ పైచేయి సాధించారు బైడెన్. ఈ ఎన్నికల్లో ట్రంప్​ 232 స్థానాల్లో విజయం సాధించగా.. బైడెన్​ 306 స్థానాల్లో గెలుపొంది అధ్యక్ష పీఠాన్ని అధిరోహించేందుకు సిద్ధమయ్యారు. అయితే.. ఓటమిని జీర్ణించుకోలేకపోయిన రిపబ్లికన్​ అభ్యర్థి ట్రంప్​.. ఎన్నికల ఫలితాలను సవాల్​ చేస్తూ కోర్టులో వ్యాజ్యం వేశారు.

ఇదీ చదవండి: 'పెన్సిల్వేనియాలో బైడెన్​దే విజయం'