ఐక్యరాజ్యసమితి (ఐరాస).. తదుపరి ప్రధాన కార్యదర్శి ఎంపిక ప్రక్రియను శుక్రవారం ప్రారంభించింది. ఈ మేరకు 193 సభ్య దేశాలు తమ అభ్యర్థి పేర్లను సమర్పించాలని కోరింది. ఐరాస జనరల్ అసెంబ్లీ అధ్యక్షుడు వోల్కన్ బోజ్కిర్, బ్రిటన్ ఐరాస ప్రతినిధి వుడ్వార్డ్ సంయుక్తంగా సమర్పించిన లేఖతో ఈ ప్రక్రియ ప్రారంభమైంది.
ప్రస్తుత ఐరాస కార్యదర్శి ఆంటోనియో గుటెరస్ పదవీ కాలం ఈ ఏడాది డిసెంబర్ 31తో ముగియనుంది. కాగా, ఆయన మరో ఐదేళ్ల పాటు ఈ పదవీలోనే ఉండాలనుకున్నట్లు ప్రకటించారు. ఈసారి తమ అభ్యర్థులుగా మహిళలను పంపాలని హోండోరస్ ఐరాస రాయబారి మేరీ ఎలిజబెత్ ఫ్లోరెస్ ఫ్లేక్.. అన్ని సభ్యదేశాలకు లేఖ రాశారు. ఇంతవరకు ఐరాసకు ప్రధాన కార్యదర్శి హోదాను ఒక్క మహిళ కూడా చేపట్టకపోవడం గమనార్హం.
అంతకుముందు పరోక్ష పద్ధతిలో జరిగిన ఐరాస ప్రధాన కార్యదర్శి ఎంపిక ప్రక్రియ.. 2015 నుంచి ప్రత్యక్ష పద్ధతిలో నిర్వహిస్తున్నారు. భద్రతా మండలిలోని 15 సభ్యదేశాలు సిఫార్సు చేసిన అభ్యర్థిని జనరల్ అసెంబ్లీ ఎన్నుకుంటుంది. ఐరాస భద్రతా మండలిలో శాశ్వత సభ్య దేశాలైన అమెరికా, రష్యా, చైనా, బ్రిటన్, ఫ్రాన్స్ మద్దతు అభ్యర్థుల ఎంపికలో కీలకం కానుంది. ఆ దేశాలకు వీటో అధికారం ఉంది.
ఇదీ చదవండి:యూఎన్ఎస్సీలో భారత్ సరికొత్త అధ్యాయం
