"రిపబ్లికన్ పార్టీలో చీలిక... మాజీ అధ్యక్షుడు ట్రంప్పై సొంత పార్టీలోనే వ్యతిరేకత... జీఓపీపై పట్టుకోల్పోతున్న ట్రంప్!"... ఇవీ కొంతకాలంగా అమెరికావ్యాప్తంగా వినిపించిన మాటలు. క్యాపిటల్ హింసాకాండ నేపథ్యంలో ఆయనపై రిపబ్లికన్ నేతలు తీవ్రస్థాయిలో విరుచుకుపడటం ఇందుకు ఓ కారణం. అందుకు తగ్గట్టుగానే మాజీ అధ్యక్షుడు డొనాల్డ్ ట్రంప్పై డెమొక్రాట్లు ప్రయోగించిన అభిశంసన అస్త్రం.. ప్రతినిధుల సభలో ఆమోదం పొందింది. ఇక జీఓపీ(రిపబ్లికన్ పార్టీ)లో ట్రంప్ శకం ముగిసినట్టే అని చాలా మంది అనుకున్నారు. కానీ శనివారంతో ఆ ఊహాగానాలు, అంచనాలకు చెక్ పడింది. అభిశంసనలో ట్రంప్ గట్టెక్కారు. రిపబ్లికన్లు ఆయన్ను గట్టెక్కించారు!
ఆధిపత్యం...
మాజీ అధ్యక్షుడు ట్రంప్.. తన ప్రసంగాలతో మద్దతుదారులను ప్రేరేపించారని.. అందుకే జనవరి 6న క్యాపిటల్పై దాడి జరిగిందన్నది డెమొక్రాట్ల వాదన. డెమొక్రాట్ల ఆధిపత్యంతో ప్రతినిధుల సభలో అభిశంసన గట్టెక్కింది.
అయితే సెనేట్లో.. అభిశంసనపై శనివారం జరిగిన విచారణలో ఏడుగురు రిపబ్లికన్ల మాత్రమే ఆయనకు వ్యతిరేకంగా ఓట్లు వేశారు. ఆ ఓట్లు సరిపోక.. అభిశంసన వీగిపోయింది. దీనిని గమనిస్తే.. అధ్యక్ష పదవిని వీడినప్పటికీ.. పార్టీపై ట్రంప్ ఆధిపత్యం తగ్గలేదని స్పష్టంగా అర్థమవుతోంది.
ఇదీ చూడండి:- ఓడింది ట్రంప్ మాత్రమే.. 'ట్రంపిజం' కాదు!
ట్రంప్ వ్యవహారంలో పార్టీ రెండుగా చీలిపోయిందన్న విషయం నిజమే. కానీ ట్రంప్కు వ్యతిరేకంగా ఓట్లు వేయడానికి మాత్రం చట్టసభ్యులు ముందుకు రాకపోవడం గమనార్హం.
అదే సమయంలో ట్రంప్ మద్దతుదారులు ఈ అభిశంసనను ప్రతిష్టాత్మకంగా తీసుకున్నారు. ట్రంప్ను ఎట్టిపరిస్థితుల్లోనైనా గట్టెక్కించాలని నిర్ణయించుకున్నారు. ఇలా ఆయనతో తిరిగి అనుబంధం పెంచుకోవాలన్నది వారి ఉద్దేశం.
ట్రంప్ను వ్యతిరేకించే వారు మాత్రంపై పార్టీ తీరుపై ఆందోళన వ్యక్తం చేస్తున్నారు. ఇదే కొనసాగితే ప్రజలకు పార్టీ దూరమైపోతుందని హెచ్చరిస్తున్నారు.
ఇదీ చూడండి:- గెలుపైనా.. ఓటమైనా... నిను వీడని నీడ మేమే!
భయంతో...?
ట్రంప్ను ఎదిరిస్తే.. తమ రాజకీయ భవితవ్యం ప్రశ్నార్థకంగా మారుతుందని పలువురు రిపబ్లికన్లు భావిస్తున్నట్టు తెలుస్తోంది. గత నెలలో.. క్యాపిటల్ హింసాకాండ అనంతరం ట్రంప్పై విరుచుకుపడ్డారు ప్రతినిధుల సభ మైనారిటీ నేత కెవిన్ మెక్కార్తీ. హింసకు ట్రంప్దే బాధ్యత అన్నారు. ఇది జరిగిన కొన్ని రోజులకే.. ఆయన మాట మార్చేశారు. విభేదాలు తొలగించేందుకు.. ఫ్లొరిడాలోని ట్రంప్ ఎస్టేట్కు వ్యక్తిగతంగా వెళ్లి మరీ భేటీ అయ్యారు.
తాజాగా.. సెనేట్లో ట్రంప్నకు వ్యతిరేకంగా ఓటు వేసిన ఏడుగురిలో ఒక్కరికి మాత్రమే రానున్న నాలుగేళ్లలో జరిగే ఎన్నికల్లో పోటీ చేసే అవకాశం ఉండటం గమనార్హం.
ఏది ఏమైనా.. ఈ అభిశంసన ఒక విషయాన్ని స్పష్టం చేస్తోంది. పార్టీలో ట్రంప్కు అసాధారణ శక్తి, మద్దతు ఉందని రుజువైంది. వాషింగ్టన్కు వేల కిలోమీటర్ల దూరంలో ఉన్నప్పటికీ.. పార్టీలో ట్రంపిజం మాత్రం చెక్కుచెదరకుండా అలగే ఉందని అర్థమైంది. 2024 అధ్యక్ష ఎన్నికల్లో పోటీ కోసం ట్రంప్కు అవకాశాలు ఇంకా తెరుచుకునే ఉన్నాయని తేలింది.
ఇదీ చూడండి:- ట్రంప్ కథ ముగిసినట్లేనా- మళ్లీ పీఠమెక్కుతారా?
