అమెరికా అధ్యక్ష ఎన్నికల ప్రచారాలు తుది దశకు చేరుకున్నాయి. నవంబర్ 3 'ఎలక్షన డే'కు ఇంకా నాలుగు రోజులే సమయం ఉన్న నేపథ్యంలో.. శుక్రవారం నుంచి ప్రచారం జోరు మరింత పెంచారు ట్రంప్, బైడెన్. అభ్యర్థులిద్దరూ కరోనా వల్ల తీవ్రంగా ప్రభావితమైన మిడ్వెస్ట్ ప్రాంతంలో పర్యటించారు. ఇందులో ట్రంప్ మిచిగాన్లోనూ, బైడెన్ లోవాలోనూ పర్యటించారు. అనంతరం ఇద్దరూ విస్కాన్సిన్, మిన్నెసోటా ప్రాంతాల్లో ప్రసంగించారు.
ఆశ.. హెచ్చరిక
తనని ఆశావాదిగా పేర్కొన్న ట్రంప్.. రోజు వందల మంది చనిపోయే పరిస్థితి నుంచి దేశాన్ని బయటపడేసినట్లు చెప్పారు. రాబోయే రోజుల్లో చికిత్సలు, టీకాల విషయంలో చాలా ఆశాభావంతో ఉన్నట్లు పేర్కొన్నారు. ట్రంప్పై విమర్శలు గుప్పించిన బైడెన్.. డొనాల్డ్ నిర్ణయాలు వైరస్ను మరింత తీవ్రతరం చేస్తాయని హెచ్చరించారు. తాము మాత్రం వైరస్ కట్టడికి చర్యలు తీసుకుంటామని పేర్కొన్నారు.
ఇప్పటికే 86 మిలియన్ల మంది తమ ఓటు హక్కు వినియోగించుకున్నారు. ట్రంప్, బైడెన్ మధ్య తీవ్ర పోటీ నడుస్తోంది. అయితే పలు పోల్స్ సర్వేల ప్రకారం రేసులో బైడెన్ స్వల్ప ఆధిక్యంలో ఉన్నట్లు తెలుస్తోంది.
వైరస్ ప్రభావిత ప్రాంతాల్లో...
రాష్ట్రాల్లో వైరస్ ఆంక్షల వల్ల ఇబ్బందులు పడిన వారి మద్దతు తమకే ఉంటుందని ట్రంప్ వ్యాఖ్యానించారు. అదే తమకు మెజార్టీ అందించి.. విజయం దిశగా నడిపిస్తుందని పేర్కొన్నారు.
వేసవి కాలంలో వైరస్ విషయంలో ట్రంప్ చేసిన పలు కామెంట్లను ప్రస్తావించిన బైడెన్.. తాను ట్రంప్ ప్రభుత్వం లాగా వైరస్ కట్టడిలో చేతులెత్తేయనని పేర్కొన్నారు. మాస్కును తప్పనిసరి చేయడం, ఆరోగ్య కార్యకర్తలతో ప్రచారం చేసి అవగాహన కల్పిస్తామని అన్నారు. వాటితో పాటు వ్యాక్సిన్లు, చికిత్సలపైనే దృష్టిసారిస్తామని స్పష్టం చేశారు.
"నేను దేశాన్ని షట్డౌన్ చేయను. ఆర్థిక వ్యవస్థను షట్డౌన్ చేయను. కానీ వైరస్ను షట్డౌన్ చేస్తా" అంటూ ట్రంప్ వైఫల్యాలను ఎత్తిచూపుతూ కామెంట్ చేశారు బైడెన్.
ఒబామాతో సంయుక్తంగా..
శనివారం పెన్సెల్వేనియా సహా దాదాపు 12 ఈవెంట్లలో ట్రంప్ పాల్గొననున్నారు. అయితే బైడెన్ లోవా, విస్కాన్సిన్, మిన్నెసోటా సందర్శనల తర్వాత శనివారం మిచిగాన్లో అడుగుపెట్టారు. ఈ ప్రాంతంలో నల్లజాతీయులు ఎక్కువగా ఉంటారు. వారి ఓటు బ్యాంక్ను ఆకర్షించేందుకు మాజీ అధ్యక్షుడు బరాక్ ఒబామాతో కలిసి సంయుక్త ర్యాలీలో పాల్గొన్నారు.
