అమెరికా ప్రముఖ అంటువ్యాధుల నిపుణుడు డా. ఫౌచీపై విరుచుకుపడ్డారు ఆ దేశాధ్యక్షుడు డొనాల్డ్ ట్రంప్. ఫౌచీ, ఆయన బృందం మాటలకు ప్రజలు విసిగిపోయారని పేర్కొన్నారు. అమెరికా అధ్యక్ష ఎన్నికలు సమీపిస్తున్న తరుణంలో సొంత యంత్రాంగంలోని వారిపై ట్రంప్ విమర్శించడం సర్వత్రా చర్చనీయాంశమైంది.
ఇటీవలే ఓ ప్రముఖ వార్తా సంస్థకు ఇంటర్వ్యూ ఇచ్చారు ఫౌచీ. ట్రంప్నకు కరోనా సోకిందన్న వార్త విని తనకు ఆశ్చర్యం కలగలేదని.. భారీ వేడుక నిర్వహించిన అనంతరం ఇది సహజమే అని వ్యాఖ్యానించారు. ఆ వేడుకలో ఎవరూ సరిగ్గా మాస్కులు పెట్టుకోలేదని.. భౌతిక దూరాన్ని కూడా పాటించలేదన్నారు. ఈ నేపథ్యంలోనే ఫౌచీపై మండిపడ్డారు ట్రంప్.
"ఫౌచీతో పాటు ఈ ఇడియట్స్ మాటలు వినీ విని ప్రజలు విసిగిపోయారు. టీవీకి ఆయన ఇంటర్వ్యూ ఇచ్చిన ప్రతిసారీ బాంబు పేలినట్టు ఉంటుంది. అయినా ఆయన్ని విధుల నుంచి తొలగించలేము. కానీ ఆయన దారుణంగా విఫలమయ్యారు."
--- డొనాల్డ్ ట్రంప్, అమెరికా అధ్యక్షుడు.
'మళ్లీ నేనే...'
మరోవైపు ఎన్నికల సమయం దగ్గరపడుతున్న కొద్దీ.. చివరి నిమిషంలో ట్రంప్ అద్భుతాలు సృష్టించాలని రిపబ్లికన్లు కోరుకుంటున్నారు. ఈ నేపథ్యంలో ట్రంప్పై ఒత్తిడి పెరుగుతున్నట్టు కనిపిస్తోంది. ఈ క్రమంలో కరోనా పరిస్థితులను పక్కనపెట్టి మరీ విపరీతంగా పర్యటనలు సాగిస్తున్నారు. మరోసారి తాను అధ్యక్ష పదవిని చేపడతానని తన మద్దతుదారులకు చెబుతున్నారు.
అయితే దేశవ్యాప్తంగా కేసులు పెరుగుతుండటం, ఫౌచీ లాంటి వ్యక్తిపై బహిరంగంగా విమర్శలు చేయడం.. ట్రంప్నకు ప్రతికూలంగా మారే అవకాశముందని నిపుణులు అభిప్రాయపడుతున్నారు.
ఇదీ చూడండి- అధికారంలో మరో నాలుగేళ్లు మనమే: ట్రంప్
