అమెరికా అధ్యక్షుడు డొనాల్డ్ ట్రంప్ రాబోయే 2020 ఎన్నికల్లో నెగ్గేందుకు సర్వశక్తులు ఒడ్డుతున్నారు. 2016 ఎన్నికల్లో తన సొంతఖర్చుతో బరిలోకి దిగిన ట్రంప్ 2020 ఎన్నికల ప్రచారం కోసం పూర్వ అధ్యక్షుల అడుగుజాడల్లో నడుస్తున్నారు. ప్రజల వద్ద నుంచి నిధులు సమకూర్చుకునేందుకు నిర్ణయం తీసుకున్నారు. ఒక బిలియన్ డాలర్లను సమకూర్చడమే లక్ష్యంగా పెట్టుకున్నారు ఈ రియాలిటీ షో స్టార్ కమ్ వ్యాపారవేత్త. ఈ నిధుల్ని సమకూరిస్తే డెమోక్రాట్లపై ట్రంప్ పైచేయి సాధించినట్టే.
ట్రంప్ మిలియన్ డాలర్లు వసూలు చేసే క్రమంలో ప్రత్యర్థులు ఎక్కువ మొత్తంలో రాబట్టేందుకు ప్రయత్నిస్తారు. అయితే డెమోక్రాటిక్ జాతీయ కమిటీ (డీఎన్సీ) ఇప్పటికే అప్పుల్లో కూరుకుపోయి ఉంది.
"డెమోక్రాట్ల అభ్యర్థి ఎవరైనా సరే.. నిధుల కొరత తప్పదు. వారు సున్నా నుంచి ప్రారంభించాలి. ఇప్పటికే డీఎన్సీ అప్పుల్లో కూరుకుపోయింది." -మైకేల్ గ్లాస్నర్, ట్రంప్ ఎన్నికల ప్రచార అధికారి.
ఈ మాసాంతంలోపు మొదటి విడత ఎన్నికల ప్రచారానికి సమకూర్చిన నిధుల లెక్కలను వెలువరించనున్నారు.
టికెట్లు పెద్దమొత్తమే...
ఈ రోజు లాస్ ఏంజిల్స్లో పర్యటించనున్నారు డొనాల్డ్. ఆయనతో డిన్నర్ చేసేందుకు 15వేల డాలర్లు, ఫోటో కోసం 50 వేల డాలర్లు, ట్రంప్తో రౌండ్ టేబుల్ సమావేశంలో కూర్చునేందుకు 150 వేల డాలర్లను కనీస ధరగా నిర్ణయించారు.
రెండు విధాలుగా సమీకరణ...
నిధుల సమీకరణకు రెండు విధానాల్ని అనుసరించనున్నారు. ట్రంప్ విక్టరీ అనే ఉమ్మడి ఖాతాను పెద్దమొత్తాలను జమ చేసేందుకు వినియోగిస్తున్నారు. 'మేక్ అమెరికా గ్రేట్ అగైన్' అనే కమిటీ ద్వారా తక్కువ మొత్తాలను సేకరించనున్నారు. దీన్ని అంతర్గతంగా 'టీ-మ్యాజిక్' అని వ్యవహరిస్తున్నారు. ఈ రెండు కాకుండా.. సంప్రదాయమైన బండ్లర్ విధానాన్ని అనుసరిస్తున్నారు. మధ్యస్థ స్థాయిలో నిధులందించే వారిని ఈ పేరుతో పిలుస్తున్నారు. ఈ విధానంలో తమ ప్రతినిధుల ద్వారా నిధులను సేకరిస్తారు.
