నవంబర్ 3న అమెరికా అధ్యక్ష ఎన్నికలు. డొనాల్డ్ ట్రంప్ చూస్తే కరోనా బారిన పడి ఆసుపత్రిలో ఉన్నారు. ఎన్నికలు సమీపిస్తోన్న వేళ ప్రతిపక్ష డెమొక్రాట్లు జోరుగా ప్రచారం చేస్తున్నారు. ఈ నేపథ్యంలో రిపబ్లికన్ పార్టీ ప్రత్యేక ప్రణాళిక సిద్ధం చేసింది. ప్రచారంలో ట్రంప్ లేని లోటు కనబడకుండా ఉండేలా ఆయన తరఫున 'ఆపరేషన్ మాగా' మొదలు పెట్టింది.
పార్టీ అధికార ప్రతినిధులు, ప్రచార పక్షాలు, మద్దతుదారులతో పెద్ద ఎత్తున ట్రంప్ తరఫున ప్రచారం నిర్వహించేదుకే ఈ 'ఆపరేషన్ మాగా'ను సిద్ధం చేశారు. మాగా అంటే 'మేక్ అమెరికా గ్రేట్ అగైన్' అని అర్థం.
కీలక ప్రాంతాల్లో...
ఈ ప్రచార పర్వంలో భాగంగా కీలక ప్రాంతాల్లో ఉపాధ్యక్షుడు మైక్ పెన్స్ సహా ట్రంప్ కుటుంబం పెద్ద ఎత్తున ర్యాలీలు నిర్వహించనున్నారు.
"ఉపాధ్యక్షుడు మైక్ పెన్స్, ట్రంప్ కుటుంబం, మిత్ర పక్షాలు, క్షేత్రస్థాయి కార్యకర్తలు పూర్తి జోష్లో ప్రచారం నిర్వహిస్తారు. డొనాల్డ్ ట్రంప్ ఒక్కరే ప్రచార బాధ్యతలు ఎలా అయితే భూజాల మీద వేసుకునేవారో అలా వీరంతా ప్రచారం చేస్తారు. ఆయన తిరిగి వచ్చే వరకు ఈ ఆపరేషన్ మాగా కొనసాగుతుంది."
- బిల్ స్టెపిన్, ట్రంప్ 2020 ప్రచార మేనేజర్
ఇందులో వర్చువల్ ప్రచార కార్యక్రమాలు ఎక్కువ ఉన్నట్లు స్టెపిన్ తెలిపారు. అక్టోబర్ 7న ఉపాధ్యక్ష డిబేట్ జరగనుంది.
ఇప్పటికే ప్రకటించిన ట్రంప్ ప్రచార కార్యక్రమాలను కొన్ని వర్చువల్గా జరపనున్నారు. మరికొన్ని వాయిదా వేశారు.
ఫుల్హౌస్...
ఇటీవల ట్రంప్ నిర్వహించిన ప్రచార ర్యాలీల్లో ఆయన అభిమానులు, మద్దతుదారులు వేల సంఖ్యలో హాజరయ్యారు. అయితే ఆరోగ్యశాఖ చెప్పిన నిబంధనలు గాలికి వదిలేసి, ఎక్కువ మంది మాస్కులు కూడా ధరించకపోవడంపై విమర్శలు వచ్చాయి.
