అమెరికా అధ్యక్షుడు డొనాల్డ్ ట్రంప్ తన ఎన్నికల క్యాంపెయిన్కు కొత్త సారథిని నియమించారు. ప్రచార బృందంలో రెండో స్థానంలో ఉన్న బిల్ స్టెపియన్ ఇక నుంచి క్యాంపెయిన్కు నేతృత్వం వహించనున్నట్లు ప్రకటించారు. ప్రస్తుతం ప్రచార విభాగాధిపతిగా ఉన్న బ్రాడ్ పార్స్కేల్ సీనియర్ సలహాదారుడి హోదాలో కొనసాగుతారని ట్రంప్ తెలిపారు. అధ్యక్ష ఎన్నికలకు నాలుగు నెలలు ఉన్న సమయంలో ట్రంప్ ఈ మార్పులు చేయడం ప్రాధాన్యం సంతరించుకుంది.
"ట్రంప్ క్యాంపెయిన్ మేనేజర్ పదవికి బిల్ స్టెపియన్ పదోన్నతి పొందారని ప్రకటిస్తున్నందుకు చాలా సంతోషంగా ఉంది. ఇన్నాళ్లు నాతో పాటే ఉండి, డిజిటల్, డేటా వ్యూహాలకు నాయకత్వం వహించిన బ్రాడ్ పార్స్కేల్ సీనియర్ సలహాదారుడి పాత్ర పోషిస్తూ అదే హోదాలో కొనసాగుతారు."
-డొనాల్డ్ ట్రంప్, అమెరికా అధ్యక్షుడు
2016 ఎన్నికల విజయంలో ఇరువురు ప్రధాన పాత్ర పోషించారని ట్రంప్ గుర్తు చేశారు. ఈ ద్వయంతో కలిసి ఈసారీ విజయం సాధించాలని అనుకుంటున్నట్లు తెలిపారు. పోల్స్లో తానే ముందంజలో ఉన్నట్లు చెప్పుకొచ్చారు.
"మా పోల్ నెంబర్లు(ముందస్తు సర్వేల్లో అనుకూల ఓట్లు) చాలా వేగంగా పెరుగుతున్నాయి కాబట్టి విజయం చాలా సులభం. ఆర్థిక వ్యవస్థ మెరుగుపడుతోంది. వ్యాక్సిన్లు, చికిత్స విధానాలు త్వరలోనే వస్తాయి. అమెరికన్లు కూడా సురక్షితమైన సమాజాన్ని కోరుకుంటున్నారు."
-డొనాల్డ్ ట్రంప్, అమెరికా అధ్యక్షుడు
అయితే తాజా ఒపీనియన్ పోల్స్లో ట్రంప్ ఎన్నికల ప్రత్యర్థి, డెమొక్రటిక్ నేత జో బైడెన్ ఆధిక్యం కనబరుస్తున్నారు. నేషనల్ పోల్స్లో అధ్యక్షుడితో పోలిస్తే 8 శాతానికి పైగా ఆధిక్యంతో కొనసాగుతున్నారు.
ప్రచార జోడీ
2016 ఎన్నికల్లో పార్స్కేల్... ట్రంప్ డిజిటల్ ప్రచారాన్ని నడిపించారు. అధ్యక్షుడు అనూహ్య విజయం సాధించడంలో కీలకంగా వ్యవహరించారు.
స్టెపియన్ కొన్నేళ్ల నుంచి రాజకీయాల్లో కొనసాగుతున్నారు. మాజీ న్యూజెర్సీ గవర్నర్ క్రిస్ క్రిస్టీతో పనిచేయడం సహా... 2016 ట్రంప్ ఎన్నికల ప్రచారంలో ఫీల్డ్ డైరెక్టర్గా స్టెపియన్ సేవలందించారు.
ఇవీ చదవండి
