అమెరికా ఆహార, ఔషధ విభాగం (ఎఫ్డీఏ)తోపాటు ఫార్మా దిగ్గజం ఫైజర్పై అమెరికా అధ్యక్షుడు డొనాల్డ్ ట్రంప్ విమర్శలు చేశారు. ఎన్నికల ముందు కరోనా టీకా ప్రకటనపై ఆలస్యం చేసి ఎన్నికల్లో ఓటమికి కారణమయ్యారని ఆరోపించారు.
మానవులపై చేసిన పరీక్షల్లో తమ టీకా 90శాతం మేర కచ్చితమైన ప్రభావం చూపించిందని ఫైజర్ ప్రకటన చేసిన నేపథ్యంలో ట్రంప్ ఈ వ్యాఖ్యలు చేశారు.
"ఎన్నికల్లో నాకు 'టీకా విజయం' దక్కకూడదని ఎఫ్డీఏ, డెమొక్రాట్లు భావించారు. నేను చెబుతూనే వస్తున్న.. ఎన్నికల తర్వాత టీకా ప్రకటన చేస్తారని.. ఇప్పుడు 5 రోజుల తర్వాత చేశారు. కానీ, ఈ పని ముందే చేసి ఉండాల్సింది.
బైడెన్ అధ్యక్షుడిగా ఉంటే ఇంకో నాలుగేళ్లు అయినా టీకా వచ్చి ఉండేది కాదు. ఇంత తొందరగా ఎఫ్డీఏ ఆమోదం వచ్చి ఉండేది కాదు. అధికార యంత్రాంగం లక్షలాది ప్రాణాలను బలి తీసుకునేది."
- డొనాల్డ్ ట్రంప్, అమెరికా అధ్యక్షుడు
మీడియాపై..
ఎన్నికల్లో మీడియా జోక్యానికి ముగింపు పలకాలని ట్రంప్ పిలుపునిచ్చారు. ప్రధాన మీడియా సంస్థలు తనపై ఇచ్చిన పోల్ సర్వేలు సరికావని ఆరోపించారు. ఇవి ఓటర్లను ప్రభావితం చేయటం సహా ప్రచారాన్ని, విరాళాల సమీకరణను తగ్గించాయని మండిపడ్డారు.
ఇదీ చూడండి: ఫైజర్ 'కరోనా వ్యాక్సిన్' 90శాతం ప్రభావవంతం!
