కోపమొచ్చి.. ఇంటర్వ్యూ మధ్యలోంచి వెళ్లిపోయిన ట్రంప్​

ఓ ప్రముఖ ఛానల్​ నిర్వహించిన ఇంటర్వ్యూను మధ్యలోనే ముగించి వెళ్లిపోయారు అమెరికా అధ్యక్షుడు డొనాల్డ్​ ట్రంప్​. ఆ ఇంటర్వ్యూకు సంబంధించిన వీడియోను ప్రసారాని కన్నా ముందే విడుదల చేస్తానని తెలిపారు ట్రంప్​. దాని ద్వారా ప్రజలకు నిజానిజాలు తెలుస్తాయన్నారు.

అమెరికా అధ్యక్షుడు డొనాల్డ్​ ట్రంప్​.. తన తెంపరితనంతో ఎప్పుడూ వార్తల్లో నిలుస్తుంటారు. తాజాగా ఓ ఛానల్​కు ఇచ్చిన ఇంటర్వ్యూనూ ఆకస్మికంగా ముగించారు. ఛానల్​పై ఆగ్రహం వ్యక్తం చేస్తూ మధ్యలోనే వెళ్లిపోయారు. ఈ ఇంటర్వ్యూకు సంబంధించిన వీడియోను ఛానెల్ లో ప్రసారానికి ముందే విడుదల చేస్తానని తెలిపారు.

ట్రంప్​తో ప్రముఖ జర్నలిస్ట్​ లాస్లే స్టాల్​ 'సీబీఎస్​ న్యూస్​ 60 మినిట్స్​'లో ఇంటర్వ్యూ నిర్వహించారు. వాస్తవానికి అది వచ్చే ఆదివారం ప్రసారం కావాల్సి ఉంది. ఈ క్రమంలో వరుస ట్వీట్లు చేశారు ట్రంప్​. ఇంటర్వ్యూ సందర్భంగా లాస్లే స్టాల్​ మాస్క్​ ధరించలేదని సూచిస్తూ.. ఓ వీడియోను పోస్ట్​ చేశారు.

" లాస్లే స్టాల్​తో 60 నిమిషాల ఇంటర్వ్యూ​ను అనుకున్న ప్రసార తేదీ కంటే ముందే విడుదల చేస్తానని మీకు తెలియజేస్తున్నా. దాని ద్వారా ప్రతి ఒక్కరు ఒక నకిలీ, పక్కదారి పట్టించే ఇంటర్వ్యూ అంటే ఏమిటో తెలుసుకుంటారు. ఎన్నికల్లో జరుగుతున్న అవకతవకలను ఇటీవల జో బైడెన్​ ఇంటర్వ్యూలతో పోల్చి చూడాలి. "

- డొనాల్డ్​ ట్రంప్​, అమెరికా అధ్యక్షుడు.

లాస్లేతో ఇంటర్వ్యూ తర్వాత శ్వేతసౌధం నుంచి నేరుగా.. పెన్సిల్వేనియా ఏరీ ప్రాంతంలో నిర్వహించిన ఎన్నికల ర్యాలీకి వెళ్లారు ట్రంప్​.

ఇదీ చూడండి: ' అందులో నేనే కింగ్​- లాబీయిస్టులకు బైడెన్​ సేవకుడు'