కొవిడ్‌-19తో విషమ పరిస్థితుల్లో ఉన్న ఆరుగురికి అమెరికాలో గుండె కణ చికిత్సను ప్రయోగాత్మకంగా అందించారు. వీరిలో నలుగురు కోలుకున్నారు. క్యాప్‌-1002 అని పిలిచే విధానాన్ని గుండె సమస్యలున్న వారికి, రోగ నిరోధక శక్తి అతిస్పందన కారణంగా తలెత్తే ఇన్‌ఫ్లమేషన్‌ను తగ్గించడానికి అనుసరిస్తారు. ఇందులో మానవ గుండె కణజాలంతో ప్రయోగశాలలో వృద్ధి చేసిన సీడీసీ కణాల (కార్డియోస్పియర్‌-డిరైవ్డ్‌ సెల్స్‌)ను వినియోగిస్తారు. ప్రస్తుత ఫలితాలు ఆశాజనకంగా ఉన్నా కొవిడ్‌ బాధితులకు ఇది సురక్షితమైన చికిత్సగా చెప్పలేమని పరిశోధకులు స్పష్టం చేస్తున్నారు.
అమెరికాలోని సెడార్స్‌-సినాయ్‌ ఆసుపత్రిలో నిర్వహించిన ఈ చికిత్సల వివరాలు 'బేసిక్‌ రీసెర్చి ఇన్‌ కార్డియాలజీ' జర్నల్‌లో ప్రచురితమయ్యాయి. కొవిడ్‌ రోగులకు ఈ తరహా చికిత్సకు అమెరికా ఆహార ఔషధ సంస్థ (ఎఫ్‌డీఏ) అనుమతి లేదు. అయితే ఇతర చికిత్సలేవీ లేనప్పుడు... అత్యవసర పరిస్థితుల్లో ఇలాంటి ప్రయోగాత్మక చికిత్సలు చేయడానికి నిబంధనలు అనుమతిస్తాయి.
