అంగారక గ్రహం మీదకు వెళ్లాలన్న లక్ష్యంతో స్పేస్ఎక్స్ సంస్థ తయారు చేసిన స్టార్షిప్ నమూనా ప్రయోగం విఫలమైంది. మంగళవారం చేపట్టిన ప్రయోగంలో స్టార్షిప్ రాకెట్.. ల్యాండింగ్ సమయంలో పేలిపోయింది. ఇలా జరగడం ఇది రెండోసారి. డిసెంబర్లో నిర్వహించిన పరీక్షల్లోనూ రాకెట్.. ల్యాండింగ్ చివరి క్షణాల్లో పేలింది.
రాకెట్ సజావుగా కిందకు దిగేందుకు ఇంజిన్లను మండించి, కొద్ది సమయం ఆపి మళ్లీ మండించాల్సి ఉంటుంది. ప్రణాళిక ప్రకారమే ప్రయోగం జరిగినప్పటికీ లాంచ్ప్యాడ్ వద్దకు చేరుకోగానే రాకెట్ ఒక్కసారిగా అగ్నిగోళంలా మండిపోయిందని సీఎన్ఎన్ వార్తా సంస్థ తెలిపింది. ప్రమాదానికి గల కారణాలు తెలియలేదని పేర్కొంది.
స్టార్షిప్ రాకెట్ పూర్తిస్థాయి పునర్వినియోగ వాహక నౌక. అంగారకుడితో పాటు, చంద్రుడిపైకి మనుషులను పంపించేందుకు స్పేస్ఎక్స్ దీన్ని తయారు చేస్తోంది. మనుషులను భూకక్ష్యలోకి ప్రవేశపెట్టేందుకూ ఇది ఉపయోగపడుతుంది.
ఇదీ చదవండి: మరోసారి పేలిన స్పేస్ఎక్స్ రాకెట్
