'భారత్ వల్లే మనకు ఇన్ని ఇబ్బందులు!'

జూన్​ చివరి నాటికి వ్యాక్సిన్​కు కొరత ఏర్పడనుందని కొవాక్స్​ ఆందోళన వ్యక్తం చేసింది. భారత్​లో కరోనా విజృంభణే ఇందుకు కారణమని పేర్కొంది. 19 కోట్ల డోసులకు కొరత ఏర్పడుతుంది, దీనిని అధిగమించేందుకు అత్యధికంగా టీకా పంపిణీ జరిపిన దేశాలు ఇతర దేశాలకు డోసులు అందించాలని విజ్ఞప్తి చేసింది.

భారత్​లో కరోనా విజృంభణ కారణంగా వ్యాక్సిన్​ డోసులకు కొరత ఏర్పడిందని కొవాక్స్​ నిర్వాహకులు వెల్లడించారు. జూన్​ చివరి నాటికి 19 కోట్ల డోసులకు కొరత ఏర్పడుతుందని పేర్కొన్నారు. దక్షిణాసియా దేశాల్లో వైరస్​ వ్యాప్తి తీవ్రంగా ఉందన్నారు. ఈ విషయంపై డబ్ల్యూహెచ్​ఓ, యూనిసెఫ్, గావీ, సీఈపీఐ సంయుక్త ప్రకటన విడుదల చేశాయి.

"కొవాక్స్​ కార్యక్రమం ద్వారా ఇప్పటివరకు సుమారు 7 కోట్ల​ డోసులను 126 దేశాల్లో పంపిణీ చేశాము. అయితే రెండో దశ పంపిణీపై ప్రస్తుతం భారత్​లో ఉన్న వైరస్​ వ్యాప్తి ప్రభావం చూపనుంది. ఈ కొరతను తీర్చేందుకు ప్రపంచ దేశాలు టీకాలను అందించాలి. అధిక శాతం టీకా పంపిణీ జరిగిన దేశాలు.. కొన్ని డోసులను ఇతర దేశాలకు అందించాలి. ఈ ఏడాదిలోగా కనీసం 100 కోట్ల డోసులను అయినా కొవాక్స్​ పంపిణీ చేయాలి."

-కొవాక్స్​ సంయుక్త ప్రకటన

డబ్ల్యూహెచ్​ఓ, యూనిసెఫ్​ సహా పలు సంస్థల ఆధ్వర్యంలో ఈ ఏడాది ఫిబ్రవరిలో కొవాక్స్​ కార్యక్రమం ప్రారంభమయింది. ఈ ఏడాది చివరి నాటికి 200 కోట్ల వ్యాక్సిన్లు పంపిణీ చేయాలని కొవాక్స్​ లక్ష్యంగా పెట్టుకుంది.

ఇదీ చదవండి : చైనాకు మిత్ర దేశాలు లేవు: అమెరికా