అమెరికాలో కొవిడ్ టీకా పంపిణీకి అడ్డంకులు ఏర్పడుతున్నాయి. టీకా కొరత కారణంగా పంపిణీ కార్యక్రమాన్ని కొన్ని రాష్ట్రాల్లో వాయిదా వేయగా.. మరి కొన్ని చోట్ల తాత్కాలికంగా రద్దు చేస్తున్నారు. కాలిఫోర్నియా, ఓహియో, వెస్ట్ వర్జీనియా, ఫ్లోరిడా, హవాయి రాష్ట్రాల్లో పరిస్థితి అద్వానంగా మారింది. టీకా కొరతపై ఆ రాష్ట్రాలు ఇప్పటికే హెచ్చరించాయి. న్యూయార్క్లో టీకాల పంపిణీపై ఆ రాష్ట్ర మేయర్ స్పందించారు.
"రాష్ట్రంలో టీకా పంపిణీని నిలిపివేయలేదు, కానీ పెరుగుతున్న డిమాండ్ను చూస్తే ప్రస్తుతం ఉన్న డోసులు సరిపోవు. కొరత వల్ల టీకా పంపిణీ వాయిదా వేయాల్సి వస్తోంది. ఇది దురదృష్టకరం."
-బిల్ దే బ్లాసియో, న్యూయార్క్ మేయర్
ఎందుకీ కొరత?
మాజీ అధ్యక్షుడు ట్రంప్ ఆదేశాల మేరకు రెండు వారాలుగా 65 ఏళ్లు పైబడిన వారికి టీకా పంపిణీని రాష్ట్రాలు విస్తృతం చేశాయి. అయితే డిమాండ్ పెరగడం వల్ల ఇప్పుడు కొరత ఏర్పడింది. ఎన్ని డోసులు అందుబాటులోకి రానున్నాయి అనే విషయంపై రాష్ట్రాలు సరైన అంచనా వేయలేకపోయాయని ఆరోగ్య శాఖ గత వారం వెల్లడించింది. ఇంకా పూర్తిస్థాయిలో డోసులు అందకుండానే టీకా పంపిణీ చేపట్టడం వల్ల ఈ సమస్య వచ్చిందని అధికారులు పేర్కొన్నారు. కొన్ని వారాల్లో మళ్లీ సరఫరా పుంజుకుంటుందని స్పష్టం చేశారు. అంచనా లేకపోవడం వల్ల పలు రాష్ట్రాల్లో ప్రజలు బారులు తీరాల్సిన పరిస్థితి ఏర్పడిందని అన్నారు.
ఇప్పటి వరకు..
అమెరికా ప్రభుత్వం ఇప్పటివరకు 3.8 కోట్ల డోసులను రాష్ట్రాలకు అందించింది. అందులో 1.75 కోట్ల డోసులను రాష్ట్రాలు వినియోగించాయి. 24 లక్షల మంది ప్రజలు రెండు డోసుల్లో టీకాను వేయించుకున్నారు.
ఇదీ చదవండి : బైడెన్కు అమెరికా మాజీ అధ్యక్షుల వీడియో సందేశం
