America Russia News: ఉక్రెయిన్ సరిహద్దులో నెలకొన్న ఉద్రిక్తతలను తగ్గించాలన్న ఉద్దేశంతో అమెరికా చేసిన ప్రతిపాదనకు రష్యా స్పందించినట్లు వస్తున్న వార్తలను ఆ దేశం ఖండించింది. ఆ వార్తల్లో నిజం లేదని రష్యా డిప్యూటీ విదేశాంగ మంత్రి అలెగ్జాండర్ గ్రుష్కో స్పష్టం చేశారు. అమెరికా ప్రతిపాదనకు రష్యా లిఖితపూర్వకంగా స్పందించిందంటూ వస్తున్న వార్తల్లో వాస్తవం లేదని అన్నారు.
"ఉక్రెయిన్ను ఎప్పటికీ నాటోలో భాగం చేసుకుబోమని అమెరికా ప్రభుత్వం, నాటో దేశాలు చట్టబద్ధంగా హామీ ఇవ్వాలి. రష్యా సరిహద్దులో మోహరించిన నాటో సైన్యాన్ని, ఆయుధాలను వెనక్కు పంపాలి." అని అగ్రరాజ్యానికి రష్యా లిఖితపూర్వకంగా వివరణ ఇచ్చినట్లు బైడెన్ సర్కార్లోని ముగ్గురు అధికారులు తెలిపారు. అయితే ఈ విషయంపై మరిన్ని వివరాలు వెల్లడించేందుకు మాత్రం వారు నిరాకరించారు. ఈ అంశాలు బహిరంగంగా చర్చించడం సరికాదన్నారు.
అయితే రష్యా లిఖితపూర్వకంగా ఇచ్చిన డిమాండ్స్ను అమెరికా ప్రభుత్వం, నాటో దేశాలు తిరస్కరించాయని.. ఒకవేళ రష్యా డిమాండ్స్ అంగీకరిస్తే.. ఉక్రెయిన్ను రష్యా ఆక్రమించుకునే ప్రమాదం ఉన్నందున అగ్రరాజ్యం ఈ నిర్ణయం తీసుకుందని వార్తలు వస్తున్నాయి.
రష్యా విదేశాంగ మంత్రి సెర్గీ లావ్రో పశ్చిమ ఐరోపా సమాఖ్యలోని దేశాలకు భద్రతా నియమాలపై ఓ సందేశం పంపారని, ఓ దేశం భద్రత వ్యవహారం మరో దేశానికి ఇబ్బంది కాకూడదన్న సందేశాన్ని అమెరికా సెక్రటరీ జనరల్ ఆంటోనీ బ్రింకెన్ కూడా చేరవేశారు కానీ అమెరికా ప్రతిపాదనకు వివరణ కాదని చెప్పినట్లు రష్యాలోని న్యూస్ ఏజెన్సీ ఆర్ఐఏ నోవెస్టీ స్పష్టం చేసింది.
ఇంకా చర్చిస్తున్నాం..
ఇదే విషయంపై రష్యా అధికార ప్రతినిధి దిమిత్రి పెస్కోవ్ కూడా స్పందించారు. ఈ విషయంపై గందరగోళం ఏర్పడిందని.. అగ్రరాజ్యం ప్రతిపాదనకు వివరణ ఇవ్వాలన్నదానిపై ప్రస్తుతం చర్చిస్తున్నామని అన్నారు.
మరోవైపు ఉక్రెయిన్లో ఉద్రిక్తతలకు అమెరికానే కారణమని రష్యా ఆరోపిస్తోంది. కైవ్లో స్వచ్ఛమైన నాజీలను అధికారంలోకి తీసుకొచ్చిందని విమర్శించింది.
ఐక్యరాజ్యసమితి భద్రతా మండలిలో 'ఉక్రెయిన్ సరిహద్దులో రష్యా బలగాల మోహరింపు'పై వాడివేడి చర్చ జరిగింది. అందులో భాగాంగానే అమెరికా, రష్యా పరస్పరం విమర్శలకు దిగాయి.
లక్షలమంది మోహరింపు..
ఉక్రెయిన్లో లక్షలమంది సైన్యాన్ని రష్యా మోహరించిందని అమెరికా రాయబారి లిండా థామస్ గ్రీన్ ఫీల్డ్ పేర్కొన్నారు. ఈ దశాబ్దంలో ఇంతలా బలగాల మోహరింపు జరగలేదని స్పష్టం చేశారు.
సైన్యాన్ని పెంచిన ఉక్రెయిన్..
రష్యాతో ఉద్రిక్తతల నేపథ్యంలో బలగాలను పెంచారు ఉక్రెయిన్ అధ్యక్షుడు జెలెనెస్కీ. కొత్తగా లక్షమందిని సైన్యంలోకి తీసుకున్నట్లు చెప్పారు. మరో మూడేళ్లలో ఉక్రెయిన్లో బలగాల సంఖ్య 3లక్షల 50వేల చేరుకుంటుందన్నారు. అంతేకాక సైనికుల జీతాలను కూడా పెంచాలని నిర్ణయించినట్లు తెలిపారు.
ఉక్రెయిన్ విషయంలో అమెరికా, రష్యా మధ్య ఉద్రిక్త పరిస్థితులు నెలకొన్నాయి. ఉక్రెయిన్పై ఏ క్షణమైనా దాడి చేసేందుకు రష్యా వ్యూహాలు రచిస్తోంది. ఇప్పటికే ఆ దేశ సరిహద్దుల సమీపంలో లక్షలాది సైనికులను మోహరించింది. అయితే ఉక్రెయిన్పై దాడి జరిగితే నాటో బలగాలు అడ్డుకుంటాయన్న వార్తలపై ఇటీవల నాటో కీలక వివరణ ఇచ్చింది. ఉక్రెయిన్కు బలగాలను పంపించే యోచన తమకు లేదని స్పష్టం చేసింది. కానీ పరోక్షంగా మద్దతు ఇచ్చే విషయంపై దృష్టి సారిస్తామని పేర్కొంది.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చదవండి: మరో 'సారీ' చెప్పిన బోరిస్‌ జాన్సన్‌
