చైనాలో ట్రంప్​కు వ్యాపారాలు- ట్యాక్స్​ రికార్డుల్లో ఏముంది?

అమెరికా-చైనా మధ్య ప్రచ్ఛన్న యుద్ధం కొనసాగుతోంది. అధ్యక్షుడిగా డొనాల్డ్​ ట్రంప్​ ఎన్నికైన తర్వాత అది మరింత తీవ్రమైంది. చైనా అంటేనే మండిపడతారు ట్రంప్​. అలాంటిది డ్రాగన్​ దేశంలో వ్యాపారం చేసేందుకు యత్నించారంటే ఎవరైనా నమ్ముతారా? అయితే.. అది నిజమే అంటోంది న్యూయార్క్​ టైమ్స్​ నివేదిక. ట్రంప్​ చైనాలో ట్రంప్​ కార్యాలయాలను నిర్వహించినట్లు.. ఆయన అధ్యక్ష పదవిలోకి వచ్చాకే పలు సంస్థలకు ఆమోదం లభించినట్లు ట్యాక్స్​ రికార్డులు చెబుతున్నాయని న్యూయార్క్​ టైమ్స్ వెల్లడించింది.​

చైనా పేరు వింటేనే కన్నెర్రజేసే అమెరికా అధ్యక్షుడు డొనాల్డ్​ ట్రంప్​.. ఆ దేశంలో వ్యాపారం చేసేందుకు ప్రయత్నించారంటే నమ్మలేం కదా!... కానీ అవుననే అంటోంది న్యూయార్క్​ టైమ్స్​ నివేదిక. చైనాలో తన వ్యాపారాన్ని విస్తరించేందుకు ట్రంప్​ ప్రయత్నించారని, తొలిసారి అధ్యక్ష పదవికి పోటీ చేసే వరకు అక్కడ కార్యాలయాన్ని నిర్వహించారని పేర్కొంది. ఓ ప్రభుత్వ సంస్థతో భాగస్వామ్యం ఏర్పరచుకునేందుకూ చూశారని తెలిపింది. అధ్యక్షుడు ట్రంప్​కు చైనా, బ్రిటన్​, ఐర్లాండ్​ దేశాల్లో మాత్రమే బ్యాంకు ఖాతాలు ఉన్నట్లు ఆయన పన్ను నివేదికల ఆధారంగా వెల్లడించింది న్యూయార్క్​ టైమ్స్​.

అయితే.. కార్పొరేట్​ పేర్లతో విదేశీ ఖాతాలు ఉన్నందున.. వాటికి సంబంధించి ఎలాంటి విషయాలు బయటకి తెలియలేదు. చైనాలోని ఖాతాను.. ట్రంప్​ ఇంటర్నేషనల్​ హోటల్స్​ మేనేజ్​మెంట్​ ఎల్​ఎల్​సీ నిర్వహిస్తోంది. 2013-2015 వరకు లైసెన్స్​ల కోసం ఒప్పందం చేసుకునే సమయంలో సుమారు 1,88,561 డాలర్ల పన్ను చెల్లించినట్లు టాక్స్​ రికార్డులు చెబుతున్నాయి.

స్థానిక పన్నులను చెల్లించేందుకు అమెరికాలోని చైనా బ్యాంకులో ఖాతా తెరిచినట్లు అధ్యక్షుడు ట్రంప్​ సంస్థ న్యాయవాది అలాన్​ గార్టెన్​ తెలిపారు.

"ఆసియాలో హోటల్స్​ను విస్తరించేందుకు చైనాలో కార్యాలయాన్ని ప్రారంభించిన తర్వాత మా సంస్థ బ్యాంకు ఖాతాను తెరిచింది. కానీ, ఎలాంటి ఒప్పందాలు, లావాదేవీలు, ఇతర వ్యాపార కార్యక్రమాలు జరగలేదు. 2015 నుంచి మా ఆఫీసు మూసివేసి ఉంది. దానివల్ల బ్యాంకు ఖాతా ఉన్నప్పటికీ ఎలాంటి ఇతర అవసరాలకు ఖాతాను వినియోగించలేదు. "

- అలాన్​ గార్టెన్​, న్యాయవాది

అధ్యక్షుడిగా ఎన్నికైన తర్వాతే ఆమోదం..

రష్యాలో మాదిరిగానే చైనాలో తన వ్యాపారాలకు లైసెన్స్​ల కోసం ట్రంప్​ ప్రయత్నించారు. 2006లో హాంగ్​కాంగ్​, మేయిన్​లాండ్​లో వ్యాపారం కోసం దరఖాస్తు చేసుకున్నప్పటి నుంచి తన ప్రయత్నాలు కొనసాగించారు. అయితే.. ట్రంప్​ అధ్యక్షుడు అయిన తర్వాతే చాలా వాటికి ఆమోదం లభించటం గమనార్హం.

2008లో గౌగ్జౌలో హోటల్​ ప్రారంభించాలని ప్రయత్నించి విఫలమయ్యారు ట్రంప్​. ఆ ప్రయత్నాలను 2012లో షాంగైలో కార్యాలయం ప్రారంభించిన తర్వాత ముమ్మరం చేశారు. చైనాలో ఆయన సంస్థ 'టీహెచ్​సీ చైనా డెవలప్​మెంట్​ ఎల్​ఎల్​సీ'.. ప్రయాణ ఖర్చులు, అధికారిక ఫీజులు, కార్యాలయాల వ్యయాలకు సంబంధించి 84,000 డాలర్లు వెచ్చించినట్లు టాక్స్​ రికార్డులు చెబుతున్నాయి. చైనాలోని ఐదు చిన్న సంస్థల్లో సుమారు 192,000 డాలర్లు పెడ్డుబడులు పెట్టారని టైమ్స్​ నివేదిక పేర్కొంది. 2018లోనూ కొంత పన్నులు, ఇతర ఖర్చులను చెల్లించినట్లు తెలిపింది.

ఇదీ చూడండి: ఎన్నికల ముందు బైడెన్​పై దర్యాప్తునకు ట్రంప్ పట్టు