కరోనాపై ప్రభావం చూపిస్తోన్న రెమ్డెసివిర్ ఔషధాన్ని త్వరలోనే అందుబాటులోకి తెస్తామని తయారీ సంస్థ గిలీడ్ సైన్సెస్ ప్రకటించింది. వచ్చే వారం మొదట్లోనే ప్రతి బాధితుడికీ అందేలా చర్యలు తీసుకుంటామని తెలిపింది.
కరోనా రోగులకు అత్యసవర సమయాల్లో ఈ ఔషధంతో చికిత్స చేసేందుకు అమెరికా ఆహార, ఔషధ నియంత్రణ విభాగం (ఎఫ్డీఏ) ఆనుమతించింది. కరోనా రోగులు వేగంగా కోలుకునేందుకు ఈ వ్యాక్సిన్ ఉపయోగపడుతోందని భారతీయ–అమెరికన్ నేతృత్వంలోని వైద్యుల బృందం తేల్చిన నేపథ్యంలో ఈ నిర్ణయం తీసుకుంది ఎఫ్డీఏ.
విరాళంగా..
ఇప్పటికే సంస్థ వద్దనున్న రెమ్డెసివిర్ మందులన్నీ ప్రభుత్వానికి విరాళంగా ఇచ్చింది గిలీడ్. సుమారు 2 లక్షల మందికి సరిపడే 15 లక్షల బాటిళ్లను సరఫరా చేసింది. పరిస్థితి తీవ్రంగా ఉన్న ప్రదేశాల్లో ఈ మందును ఉపయోగకరంగా వాడాలని సూచించింది.
వ్యాక్సిన్ కూడా..
ప్రస్తుతానికి ఆసుపత్రిలో చికిత్స పొందుతున్నవారికే రెమ్డెసివిర్ను ఉపయోగించేందుకు అనుమతి ఉంది. ఎందుకంటే ఈ ఔషధం పనితనంపై క్లినికల్ ట్రయల్స్ ఇంకా కొనసాగుతున్నాయి.
కరోనాను ఎదుర్కొనేందుకు వ్యాక్సిన్ తయారీ చేస్తున్నట్లు గిలీడ్ సీఈఓ డాన్ ఓడే తెలిపారు. ఇప్పటికే ఈ విషయాన్ని అమెరికా అధ్యక్షుడు డొనాల్డ్ ట్రంప్ కూడా స్పష్టం చేశారు. వ్యాక్సిన్ తయారీ విషయంలో ప్రభుత్వ సంస్థలతో కలిసి గిలీడ్ కృషి చేస్తోందన్నారు.
