ఐక్యరాజ్య సమితి జనరల్ అసెంబ్లీ అధ్యక్షుడు వోల్కన్ బోజ్కిర్పై భారత్ చేసిన వ్యాఖ్యలు విచారకరమని ఆయన ప్రతినిధి అమీ క్వాంట్రిల్ అన్నారు. భారత్-పాక్ మధ్య శాంతి కోసం అధ్యక్షుడు కృషి చేస్తుంటే ఈ వైఖరి సరికాదని ఆమె అన్నారు. యూఎన్ ప్రధాన కార్యాలయంలో ఏర్పాటు చేసిన మీడియా సమావేశంలో ఆమె ఈ వ్యాఖ్యలు చేశారు.
పాక్ విదేశాంగ మంత్రితో భేటీ సందర్భంగా వోల్కన్ బోజ్కిర్.. భారత్, పాక్ల మధ్య 1972లో జరిగిన సిమ్లా ఒప్పందాన్ని ప్రస్తావించారని క్వాంట్రిల్ తెలిపారు. దక్షిణాసియాలో శాంతి, స్థిరత్వం నెలకొనడం భారత్-పాకిస్థాన్ల దౌత్య సంబంధాలపై ఆధారపడి ఉంటుందని జోజ్కిర్ పాకిస్థాన్ పర్యటన సందర్భంగా పేర్కొన్నారని ఆమె అన్నారు. ఇరు దేశాలు చర్చల ద్వారా సమస్యలు పరిష్కరించుకునేందుకు అధ్యక్షుడు ఎప్పుడూ మద్దతుగా నిలుస్తారని స్పష్టం చేశారు.
భారత్ వ్యాఖ్యలు
ఇటీవల యూఎన్ అధ్యక్షుడు.. పాకిస్థాన్ పర్యటన సందర్భంగా కశ్మీర్ అంశాన్ని ప్రస్తావించారు. బోజ్కిర్ వ్యాఖ్యలను భారత్ ఖండించింది. ఆయన వ్యాఖ్యలు తప్పుదోవపట్టించే విధంగా, పక్షపాతంగా ఉన్నాయని.. తన హోదాకు బోజ్కిర్ అపకారం చేశారని మండిపడింది.
ఇదీ చదవండి : గాజా వివాదంపై ఓటింగ్కు భారత్ దూరం
