కరోనా వైరస్ కారణంగా విధించిన లాక్డౌన్ ఆంక్షలను క్రమంగా సడలిస్తున్నాయి ప్రపంచదేశాలు. అయితే ఆంక్షలు సడలిస్తే కరోనా తీవ్రత మరింత పెరిగే అవకాశం ఉందన్న అంచనాలు ఆందోళన కలిగిస్తున్నాయి. అయినా సంక్షోభంలో కూరుకుపోయిన ఆర్థిక వ్యవస్థను గాడిన పెట్టాలంటే ఆంక్షలు సడలించక తప్పడం లేదు.
ఈ విపత్కర పరిస్థితిని దీటుగా ఎదుర్కొనేందుకు ఓ పరిష్కార మార్గాన్ని చూపారు అమెరికాలోని జార్జియా సాంకేతిక విశ్వవిద్యాలయం పరిశోధకులు. కరోనా నుంచి కోలుకున్నవారు.. ఈ మహమ్మారి వ్యాప్తి రేటును తగ్గించేందుకు ఉపయోగపడతారని వెల్లడించారు. నేచర్ మెడిసిన్ జర్నల్లో ఈ అధ్యయనం ప్రచురితమైంది.
ఎలా..?
కరోనా నుంచి కోలుకున్న వారిలోని షీల్డ్ ఇమ్యూనిటీ.. మరోమారు వైరస్ బారిన పడే అవకాశాలను బాగా తగ్గిస్తుందని అంచనా వేశారు పరిశోధకులు. ఆరోగ్య కేంద్రాలతో పాటు మనుషుల తాకిడి ఎక్కువగా ఉండే ప్రాంతాల్లో పనిచేసేందుకు వీరు సురక్షిత ప్రత్యమ్నాయంగా ఉపయోగపడతారని వెల్లడించారు. దీని ద్వారా వైరస్ వ్యాప్తి రేటు తగ్గుతుందని అభిప్రాయపడ్డారు.
" కరోనా నుంచి కోలుకున్న వారి సాయంతో ఎక్కువ మందిని వైరస్ బారి నుంచి కాపాడవచ్చు. కరోనా వైరస్ నుంచి రక్షించే యాంటీబాడీలు కలిగిన వారిని గుర్తించేందుకు విశ్వసనీయ పరీక్షలేమి ఇప్పటి వరకు లేవు. అయితే.. సెరోలాజికల్ పరీక్షల ద్వారా కొవిడ్-19 నుంచి కోలుకున్న వారిని గుర్తించటంపై మేము దృష్టి సారించాం."
- పరిశోధకులు, జార్జియా సాంకేతిక విశ్వవిద్యాలయం
కానీ..?
అయితే ఈ విధానం అమలుపై పరిశోధకులు కొన్ని అనుమానాలు వ్యక్తం చేశారు. కరోనాను జయించిన వారిలో వైరస్ తిరిగి సోకకుండా నిరోధించే రోగనిరోధక శక్తి ఎంత కాలం ఉంటుందనేది తెలియదన్నారు. గతంలో సార్స్ వంటి వైరస్ల బారిన పడి కోలుకున్న వారిలో యాంటీబాడీలు సుమారు 2 ఏళ్ల పాటు ఉన్నట్లు తెలిపారు. మెర్స్ వంటి వైరస్ల నుంచి కోలుకున్న వారిలో రోగనిరోధక శక్తి సుమారు 3 ఏళ్లు ఉన్నట్లు చెప్పారు.
- ఇదీ చూడండి: 'భయపడే రోజులు పోయాయి- ఇక బయటకు రావాలి'
