భారత్పై చైనా చేస్తున్న కుయుక్తులను అగ్రరాజ్యం అమెరికా ఎండగట్టింది. సరిహద్దు వివాదాన్ని తీవ్రతరం చేస్తోన్న చైనా ఆర్మీపై విమర్శలు గుప్పించింది. చైనా కమ్యూనిస్ట్ పార్టీ ఒక 'ధూర్త శక్తి'గా అభివర్ణించింది. ఇటీవల చైనా అవలంభిస్తున్న తీరును తప్పుపట్టారు అమెరికా విదేశాంగ శాఖ మంత్రి మైక్ పాంపియో. నాటో వంటి సంస్థల ద్వారా సాధించిన పురోగతిని కాలరాసి, బీజింగ్కు అనుగుణంగా ఉండే కొత్త నియమ నిబంధనలను అనుసరించాలని చైనా కమ్యూనిస్ట్ పార్టీ కోరుకుంటోందని పేర్కొన్నారు.
శుక్రవారం జరిగిన కోపన్హాగెన్ ప్రజాస్వామ్య సదస్సును ఉద్దేశించి ఈ మేరకు వ్యాఖ్యానించారు.
" భారత్తో సరిహద్దు వివాదాన్ని పీపుల్స్ లిబరేషన్ ఆర్మీ పెంచుతోంది. దక్షిణ చైనా సముద్రంలో బలగాలను మోహరించి అక్రమంగా ఎక్కువ భూభాగాన్ని ఆక్రమించింది. కీలకమైన సముద్ర మార్గాలను తమ అధీనంలోకి తెచ్చుకునే ప్రయత్నం చేస్తోంది. ఐక్యరాజ్య సమితి ఒప్పందాలను కాలరాస్తూ హాంకాంగ్ ప్రజల స్వేచ్ఛను హరిస్తోంది. చైనా కమ్యూనిస్ట్ పార్టీ(సీసీపీ) అనేక అంతర్జాతీయ ఒప్పందాలను ఉల్లంఘిస్తోంది. చైనా ముస్లింలపై అణచివేతకు పాల్పడుతోంది. అది రెండో ప్రపంచ యుద్ధం తర్వాత ఎన్నడూ చూడనటువంటి మానవహక్కుల ఉల్లంఘన. తన సొంత పరిసరాల్లో సీసీపీ ధూర్త శక్తి మాత్రమే కాదు.. కరోనా వైరస్పై అబద్ధాలు చెప్పింది. దాంతో వైరస్ ప్రపంచవ్యాప్తంగా విస్తరించింది. డబ్ల్యూహెచ్ఓపై ఒత్తిడి చేసి.. తమ తప్పును కప్పిపుచ్చుకనే ప్రయత్నం చేసింది చైనా. అది లక్షల మంది ప్రాణాలు పోయేందుకు, ప్రపంచ ఆర్థిక వ్యవస్థ దెబ్బతినేందుకు కారణమైంది."
- మైక్ పాంపియో, అమెరికా విదేశాంగ మంత్రి.
తూర్పు లద్దాఖ్లోని గల్వాన్ లోయలో చైనా సైనికులతో ఘర్షణ తలెత్తి ప్రాణాలు కోల్పోయిన 20 మంది భారత జవాన్లుకు సంతాపం ప్రకటించారు మైక్ పాంపియో. వారి కుటుంబాలకు తన ప్రగాఢ సానుభూతి తెలిపారు. గాయపడ్డ సైనికులు త్వరగా కోలుకోవాలని ఆకాంక్షించారు.
ఇదీ చూడండి: 'అందుకే భారత్తో చైనా కయ్యానికి కాలు దువ్వుతోంది'
