ప‌్ర‌పంచాన్ని వ‌ణికిస్తోన్న కరోనా వైర‌స్ మహమ్మారిని ఎదుర్కొనేందుకు వ్యాక్సిన్ అభివృద్ధి కోసం ప్ర‌పంచ‌వ్యాప్తంగా నిర్విరామ కృషి జ‌రుగుతోంది. వీటిలో ఇప్ప‌టికే ప‌లు కంపెనీలు మానవులపై ప్ర‌యాగ‌ద‌శ‌లో కొంత పురోగతి సాధించాయి. తాజాగా జ‌ర్మ‌నీకి చెందిన బ‌యోఎన్‌టెక్‌తోపాటు, అమెరికా ఫార్మా దిగ్గ‌జాల్లో ఒక‌టైన ఫైజ‌ర్ సంయుక్తంగా రూపొందించిన టీకా మెరుగైన ఫ‌లితాలు ఇస్తున్న‌ట్లు ఆ కంపెనీలు వెల్లడించాయి. మాన‌వుల్లో జ‌రిపిన తొలిద‌శ ప్ర‌యోగాల్లో వైర‌స్‌ను త‌ట్టుకునే సామర్థ్యాన్ని గుర్తించిన‌ట్లు ఆ కంపెనీలు ప్ర‌క‌టించాయి.
ప్ర‌పంచ‌వ్యాప్తంగా ఇప్ప‌టికే కోటిమందికి ఈ మ‌హ‌మ్మారి సోక‌గా, వీరిలో ఇప్పటివరకు 5ల‌క్ష‌ల 15వేల మంది బ‌ల‌య్యారు. ఈ మ‌హ‌మ్మారి అంతం చేసేందుకు ఇప్ప‌టికే 17కంపెనీలు వ్యాక్సిన్ రూప‌క‌ల్ప‌న‌లో భాగంగా మాన‌వ ప్రయోగద‌శ‌కు చేరుకున్నాయి. తాజాగా బయోఎన్టెక్, ఫైజ‌ర్ అభివృద్ధి చేసిన టీకా కూడా మెరుగైన ఫ‌లితాలు ఇస్తున్న‌ట్లు వెల్లడించాయి. దీంతో ఇప్ప‌టికే మాన‌వప్ర‌యోగాల్లో ముందున్న ఆక్స్‌ఫర్డ్‌, మోడెర్నా, కాన్సినో బ‌యోలాజిక్స్‌, ఇనోవియా ఫార్మాల స‌ర‌స‌న తాజాగా ఈ కంపెనీలు చేరాయి.
బయోఎన్టెక్ కంపెనీ 'BNT162b1' పేరుతో రూపొందించిన వ్యాక్సిన్‌ను 24 మంది వాలంటీర్ల‌పై రెండు డోసుల్లో ప‌రీక్ష‌లు నిర్వ‌హించింది. 28రోజుల అనంత‌రం వైర‌స్ సోకిన వారికంటే వీరిలో అధికంగా కరోనా వైర‌స్‌ను ఎదుర్కొనే యాంటీబాడీస్ అభివృద్ధి చెందినట్లు తేలింద‌ని కంపెనీ స్ప‌ష్టంచేసింది. ఈ వ్యాక్సిన్ శ‌రీరంలో రోగ‌నిరోధ‌కశ‌క్తిని గ‌ణ‌నీయంగా పెంచుతున్న‌ట్లు తొలిప్ర‌యోగంలో నిరూపిత‌మైన‌ట్లు బయోఎన్టెక్ స‌హ వ్య‌వ‌స్థాప‌కుడు, సీఈఓ ఉగుర్ సాహిన్ తెలిపారు. అయితే, వైర‌స్ సంక్ర‌మ‌ణ నుంచి కాపాడుతుంద‌నే విష‌యాన్ని తెలుసుకునేందుకు భారీ ప్ర‌యోగానికి సిద్ధ‌మ‌వుతున్నామ‌ని వెల్ల‌డించారు. ఈ ప్ర‌యోగంలో న‌లుగురికి మూడు వారాల్లో రెండు ఇంజెక్ష‌న్లు చేయ‌గా, వీరిలో ముగ్గురికి స్వ‌ల్ప జ్వ‌రం మాత్రమే వ‌చ్చిన‌ట్లు గుర్తించామ‌ని బయోఎన్టెక్ తెలిపింది. ఇంజెక్ష‌న్ నొప్పి కార‌ణంగా మూడో డోస్‌ను మ‌రో బృందంపై ప‌రీక్షించామ‌ని పేర్కొంది. ఏప్రిల్‌, మే నెల‌లో జ‌రిపిన ప్ర‌యోగాల ఫ‌లితాల‌తోపాటు మ‌రో మూడుర‌కాల వ్యాక్సిన్ వివ‌రాల‌ను తొంద‌ర‌లోనే ప్ర‌క‌టిస్తామ‌ని బయోఎన్టెక్ సంస్థ వెల్లడించింది.
మ‌రో ద‌శ ప్ర‌యోగానికి సిద్ధం..
త‌దుప‌రి ప్రయోగాలు జులై చివ‌రి వారంలో నిర్వ‌హించేందుకు బయోఎన్టెక్, ఫైజ‌ర్‌లు సిద్ధ‌మ‌య్యాయి. నియంత్ర‌ణ సంస్థ‌ల అనుమ‌తి రాగానే అమెరికాతోపాటు ఐరోపాలో ఈ ప్రయోగాలు నిర్వ‌హించేందుకు ఏర్పాట్లు చేసుకుంటున్నాయి. దీనిలోభాగంగా దాదాపు 30వేల మంది ఆరోగ్య‌వంతుల‌పై ప్రయోగాలు జరిపేందుకు ఏర్పాట్లు చేసుకొన్నట్లు స‌మాచారం. అంతేకాకుండా వ్యాక్సిన్ విజ‌య‌వంత‌మైతే 2020 చివ‌రి నాటికి దాదాపు 20కోట్ల డోసుల‌ను, 2021చివ‌ర‌కు 120కోట్ల వ్యాక్సిన్ డోసుల‌ను తయారు చేయాలనే లక్ష్యంతో పనిచేస్తున్నాయి.
ప్ర‌స్తుతం ప్రారంభ ప్ర‌యోగాల్లో ఈ వ్యాక్సిన్ ఫ‌లితాలు మెరుగుగానే ఉన్నాయ‌ని బ‌ర్న్‌స్టెయిన్ విశ్లేష‌కులు అభిప్రాయ‌ప‌డ్డారు. కానీ, ప్రారంభ ఫ‌లితాల‌తోనే ఈ వ్యాక్సిన్ పూర్తిస్థాయిలో ర‌క్ష‌ణ క‌ల్పిస్తుంద‌ని చెప్ప‌లేమ‌ని అన్నారు.
లాభాల్లో కంపెనీ షేర్లు..
తాజా ప్ర‌క‌ట‌న‌తో బయోఎన్టెక్ కంపెనీ షేర్లు ఒక్క‌సారిగా 19శాతం పెరగ‌డంతో కంపెనీ మొత్తం షేర్లు మూడు నెల‌ల గ‌రిష్టంగా 8శాతానికి పెరిగాయి. దీనితోపాటు ఫైజ‌ర్ ఫార్మా కంపెనీ షేర్లు కూడా 4.4శాతానికి పెరిగాయి. ఈ స‌మ‌యంలో వీటికి పోటీ కంపెనీలైన మోడెర్నా, నోవావాక్స్ కంపెనీల షేర్లు త‌గ్గ‌డం గ‌మ‌నార్హం.
వ్యాక్సిన్ కోసం ఎదురుచూపు..
కరోనా వైర‌స్‌ను ఎదుర్కొనేందుకు ఇప్పటివరకు ఏ వ్యాక్సిన్‌ను కూడా వాణిజ్యప‌రంగా ఉప‌యోగించేందుకు ఆమోదం పొంద‌లేదు. వ్యాక్సిన్ ప్ర‌యోగంలో భాగంగా తొలిద‌శ పూర్తి చేసుకున్న ప్ర‌తి మూడు వ్యాక్సిన్‌ల‌లో కేవ‌లం ఒక‌టి మాత్రమే ఆమోదం పొందుతున్న‌ట్లు మ‌సాచుసెట్స్ ఇన్‌స్టిట్యూట్ విశ్లేష‌ణ‌లో వెల్ల‌డైంది. టీకాల వ‌ల్ల శ‌రీరంలో యాంటీబాడీస్‌ల‌ను అంచ‌నా వేయ‌డంతోపాటు రోగ‌నిరోధ‌క శ‌క్తి స్థాయిల‌ను అంచ‌నా వేయ‌డానికి మాన‌వుల్లో తొలిద‌శ ప్రయోగాలు నిర్వహిస్తారు. అనంత‌రం వైర‌ప్‌పై పోరాడ‌డానికి శ‌రీరం సంసిద్ధంగా ఉందో, లేదో అనే విష‌యాన్ని తెలుసుకుంటారు. ఇలా వ్యాక్సిన్ పొందిన వారిలో త‌దుప‌రి ప్రయోగాలు జరిపేందుకు ఫార్మా కంపెనీలు ఆస‌క్తిగా ఎదురుచూస్తున్నాయి.
ఇదీ చదవండి:109 రూట్లలో ఇక ప్రైవేట్ రైళ్ల పరుగులు!
