ట్రంప్​ను నిరోధించేందుకు పెలోసీ కీలక సూచనలు

మరో పది రోజుల్లో అమెరికా అధ్యక్షుడు డొనాల్డ్​ ట్రంప్.. పదవి నుంచి దిగిపోనున్నారు. ఈ నేపథ్యంలో సైనిక చర్యలకు, అణ్వస్త్ర దాడికి పాల్పడకుండా ట్రంప్​ను నిరోధించే అంశంపై సైనిక ఉన్నతాధికారులతో చర్చలు జరుపుతున్నారు స్పీకర్​ పెలోసీ .

అమెరికాలో పదవి నుంచి దిగిపోనున్న అధ్యక్షుడు డొనాల్డ్​ ట్రంప్​ అధికారాలను కత్తిరించేందుకు చర్యలు మొదలయ్యాయి. ఈ చివరి రోజుల్లో సైనిక చర్యలకు, అణ్వస్త్ర దాడికి ఆదేశాలివ్వకుండా ఆయనను నిరోధించే అంశంపై అమెరికా ప్రతినిధుల సభ స్పీకర్​ నాన్సీ పెలోసీ.. అత్యున్నత సైనికాధికారి జనరల్​ మార్క్ మిల్లేతో చర్చించారు.

"మానసిక స్థితి సరిగా లేని ఈ అధ్యక్షుడి వల్ల దేశానికి చాలా ప్రమాదం. దాదాపు 50ఏళ్ల కిందట నిక్సన్​ను కాంగ్రెస్​లోని రిపబ్లికన్లు సాగనంపారు. నేడు కూడా వారు అదే చర్యను చేపట్టి, ట్రంప్​నకు ఉద్వాసన పలకాలి. ఆయన తనంతట తానుగా వైదొలగకుంటే..తదుపరి చర్యలను కాంగ్రెస్​ చేపడుతుంది."

---అమెరికా ప్రతినిధుల సభ స్పీకర్​ నాన్సీ పెలోసీ

స్థిరచిత్తాన్ని కోల్పోయిన అధ్యక్షుడికి అణ్వస్త్ర దాడికి సంబంధించిన రహస్య సంకేతాలను అందుబాటులో లేకుండా చేసే ముందు జాగ్రత్తలపై మార్క్​తో చర్చించానని అమెరికా ప్రతినిధుల సభ స్పీకర్​ నాన్సీ పెలోసీ స్పష్టం చేశారు.

ఇదీ చదవండి : బైడెన్ ప్రమాణ స్వీకారానికి నేను రాను: ట్రంప్​