అమెరికా అధ్యక్షుడు డొనాల్డ్ ట్రంప్ అభిశంసనపై కీలక ప్రకటన చేశారు ఆ దేశ కాంగ్రెస్ దిగువసభ స్పీకర్ నాన్సీ పెలోసీ. అభిశంసనపై ముసాయిదా బిల్లు రూపొందించనున్నట్లు స్పష్టం చేశారు. అధ్యక్షుడు తన సొంత ప్రయోజనాల కోసం ఎన్నికల్లో మరోసారి అవకతవకలకు పాల్పడాలని చూస్తున్నందునే ఈ నిర్ణయం తీసుకున్నట్లు.. ఓ ప్రకటనలో స్పష్టం చేశారు.
" మన ప్రజాస్వామ్యం ప్రమాదంలో ఉంది. అధ్యక్షుడు తన సొంత ప్రయోజనాల కోసం మరోసారి ఎన్నికల్లో అవకతవకలకు పాల్పడాలని ప్రయత్నిస్తున్నందున చర్యలు తీసుకోవడం తప్ప మాకు వేరే మార్గం లేదు."
-నాన్సీ పెలోసీ, దిగువసభ స్పీకర్
క్రిస్మస్ లోపు ట్రంప్ను అభిశంసన ఓటింగ్లో ఓడించి.. అధ్యక్ష పదవి నుంచి దింపాలని డెమొక్రాట్లు భావిస్తున్నారు. ఈ నేపథ్యంలో బుధవారమే డెమొక్రాట్లతో ఏకాంత భేటీ అయ్యారు పెలోసీ. అభిశంసనపై ఓటింగ్కు మీరు సిద్ధంగా ఉన్నారా? అని ప్రశ్నించగా.. వారందరూ అందుకు సుముఖత వ్యక్తం చేసినట్లు సమాచారం. అనంతరం అభిశంసనపై ముసాయిదా బిల్లు ఏర్పాటు చేయనున్నట్లు గురువారం ఉదయం ప్రకటించారు పెలోసీ.
అభిశంసనలో విజయం మాదే..
అభిశంసనపై ముసాయిదా బిల్లు ఏర్పాటు చేసేందుకు స్పీకర్ నాన్సీ పెలోసీ అంగీకారం తెలపటంపై తనదైన శైలిలో స్పందించారు ట్రంప్. అభిశంసనలో విజయం సాధిస్తామని ధీమా వ్యక్తం చేస్తూ ట్వీట్ చేశారు.
అభిశంసన ఎందుకు
2020 అధ్యక్ష ఎన్నికల్లో తన ప్రత్యర్థి అయిన జో బిడెన్పై దర్యాప్తు చేపట్టాలని.. ఉక్రెయిన్ అధ్యక్షుడిపై ట్రంప్ ఒత్తిడి తెచ్చారన్న అంశంపై.. అభిశంసన చేపట్టాలని డెమొక్రాట్లు డిమాండ్ చేస్తున్నారు.
ఇదీ చూడండి: ట్రంప్ కుమారుడు, భార్య ఎంట్రీతో 'అభిశంసన'లో కొత్త ట్విస్ట్
