కరోనాతో ప్రపంచమంతా మాస్కు మాటున బతుకుతోంది. మాస్కులు ధరించడం మొదలుపెట్టాక.. తెలిసిన వాళ్లను గుర్తుపట్టడం కూడా కష్టంగా మారుతోంది. అయితే మనుషులు మాత్రమే కాకుండా కంప్యూటర్లు సైతం.. మాస్కులు ధరించిన వాళ్ల ముఖాలను గుర్తించడంలో విఫలమవుతున్నాయని అంటోంది అమెరికాకు చెందిన నేషనల్ ఇన్స్టిట్యూట్ ఆఫ్ స్టాండర్డ్స్ అండ్ టెక్నాలజీ(ఎన్ఐఎస్టీ) ఏజెస్సీ అధ్యయనం.
భారత్లాంటి జనసాంద్రత ఉన్న దేశాల్లో త్వరితగతిన నేరస్థులను పట్టుకునేందుకు 'ఫేషియల్ రికగ్నీషన్ సిస్టమ్' చేసే సాయం అంతా ఇంతా కాదు. గ్రామస్థాయి నుంచి అంతర్జాతీయ స్థాయి వరకు ఎన్నో క్లిష్టమైన కేసులకు ఈ వ్యవస్థ పరిష్కారం చూపింది. కానీ ఇప్పుడు ఆ టెక్నాలజీకే సవాల్ విసురుతున్నాయి మాస్కులు.
మాస్కులు వేసి.. తీసేసి..
ఫేషియల్ రికగ్నీషన్ ప్రక్రియలో మాస్కు కారణంగా డిజిటల్ వ్యవస్థ పూర్తిస్థాయిలో ఫలితాలను ఇవ్వలేకపోతోందని ఎన్ఐఎస్టీ నివేదిక చెబుతోంది.
మాస్కులు ధరించిన వారి ముఖాలను గుర్తించడంలో 'ఫేషియల్ రికగ్నిషన్ సిస్టమ్' ఎలా పని చేస్తుందని ఎన్ఐఎస్టీ అధ్యయనం చేసింది. ఇందుకోసం ఓ సాఫ్ట్వేర్ను పరీక్షించారు పరిశోధకులు. కొన్ని ఫొటోలకు డిజిటల్ మాస్కులను వేసి పరీక్షించారు. వీటితో మిగిలిన ఫొటోలను పోల్చి చూశారు.
ఇలా 10లక్షల మందికి సంబంధించిన 6.2 మిలియన్ ఫొటోలను స్కాన్ చేశారు. ఇందుకోసం 89 అల్గారిథమ్లను ఉపయోగించారు. సాధారణంగా.. ఆ సాఫ్ట్వేర్ విఫలమయ్యే అవకాశాలు 0.3శాతం మాత్రమే. కానీ డిజిటల్ మాస్కు వేసిన ఫొటోలను గుర్తుపట్టడంలో 5శాతం వైఫల్యం కనపడినట్లు పరిశోధకులు వెల్లడించారు. ఈ సందర్భంగా వినియోగించిన అల్గారిథమ్లు 20శాతం నుంచి 50శాతం వరకు విఫలమైనట్లు ప్రకటించారు. అయితే ముఖాన్ని గుర్తించడంలో జాతి, లింగ భేదం, వయస్సు కూడా ప్రభావితం చూపినట్లు పేర్కొంది. వీటితో పాటు మాస్కులను ధరించే విధానాల వల్ల కూడా సాఫ్ట్వేర్లు బోల్తాపడుతున్నాయి.
మాస్కులతో తిప్పలు...
కరోనా కారణంగా తొలుత మాస్కులను తప్పనిసరి చేసిన హాంకాంగ్.. తర్వాత వాటిని ధరించడాన్ని నిషేధించింది. చైనా తీసుకొచ్చిన చట్టానికి వ్యతిరేకంగా జరిగే ఆందోళనల్లో నిరసనకారులు మాస్కులు ధరించి పాల్గొనడం వల్ల వారిని గుర్తించడం కష్టమైంది. అందుకే ఆ దేశంలో మాస్కుల వాడకాన్ని నిషేధించింది.
అమెరికాలో జార్జి ఫ్లాయిడ్ మృతికి వ్యతిరేకంగా జరిగిన ఆందోళనల్లోనూ నిరసనకారులు మాస్కులు ధరించారు. దీంతో వారిని పట్టుకోవడం అక్కడి పోలీసులకు తలకుమించిన భారమైంది.
అలాగే లండన్లో కరోనాను అరికట్టేందుకు ఏర్పాటు చేసిన హైటెక్ నిఘాను వ్యతిరేస్తూ ప్రైవసీ యాక్టివిస్ట్లు జామెట్రిన్ ఆకారంలోని మాస్కులు ధరించి ఆందోళనల్లో పాల్గొన్నారు. ఫలితంగా వారిని గుర్తించడంలో లండన్ పోలీసులు విఫలమయ్యారు.
తలలు పట్టుకుంటున్న దేశాలు..
మాస్కులు.. నిఘా వ్యవస్థకు విఘాతంగా మారిన నేపథ్యంలో దేశాలు తలలు పట్టుకుంటున్నాయి. ఈ సమస్యను అధిగమించేందుకు పరిష్కార మార్గాలను వెతికేపనిలో పడ్డాయి. మాస్కులు ధరించే ప్రక్రియలో మార్పులు చేయాలా? లేక ముఖాలను గుర్తించే సరికొత్త సాంకేతిక పరిజ్ఞానాన్ని తయారు చేయాలా? అనే సందిగ్ధంలో ప్రపంచ దేశాలు సమాలోచనలు చేస్తున్నాయి.
