ప్రపంచ దేశాలపై కరోనా కోరలు చాస్తోంది. ప్రపంచవ్యాప్తంగా వైరస్ బాధితుల సంఖ్య కోటీ 17 లక్షల 72 వేలకు చేరింది. మరణాల సంఖ్య 5 లక్షల 41 వేలు దాటింది.
రష్యాలో మరో 6 వేల కేసులు..
రష్యాపై కరోనా పంజా విసురుతూనే ఉంది. రోజురోజుకు వేల సంఖ్యలో కేసులు నమోదవుతూనే ఉన్నాయి. తాజాగా మరో 6,368 మందికి వైరస్ నిర్ధరణ అయింది. మొత్తం కేసుల సంఖ్య 7 లక్షలకు చేరువైంది.
పాకిస్థాన్లో మరో 2,691 కేసులు
పాకిస్థాన్లో కరోనా తగ్గుముఖం పడుతోంది. తాజాగా 2,637 కేసులు మాత్రమే నమోదయ్యాయి. మరో 77 మంది మృతి చెందారు. దేశవ్యాప్తంగా 2,34,509 మంది బాధితులు ఉన్నారు. వీరిలో 1,34,957 మంది వైరస్ నుంచి కోలుకోగా... 4,839 మందిని కరోనా పొట్టనబెట్టుకుంది.
ఇరాన్లో 200 మంది మృతి..
ఇరాన్లో కరోనా కేసులు తగ్గినప్పటికి, మరణాలు మాత్రం పెరుగుతున్నాయి. ఎన్నడూ లేని విధంగా రికార్డు స్థాయిలో కొత్తగా 200 మంది మృతి చెందారు. ఇప్పటివరకు ఒక్కరోజులో నమోదైన కేసుల్లో ఇదే అత్యధికం.
- బంగ్లాదేశ్లో మరో 3 వేల కేసులు నమోదు కాగా... మొత్తం కేసుల సంఖ్య లక్షా 69 వేలు దాటింది. వీరిలో 2 వేల మంది వైరస్ కారణంగా మృత్యుఒడికి చేరారు.
- మెక్సికోలో కరోనా ఉద్ధృతి కొనసాగుతోంది. మొత్తం కేసుల సంఖ్య 2,61,750కి చేరింది.
- చైనాలో ఇవాళ మరో 8 మందిలో వైరస్ బయటపడింది. దీంతో మొత్తం కేసుల సంఖ్య 84 వేలకు చేరువైంది.
| దేశాలు | మొత్తం కేసులు | మరణాలు |
| అమెరికా | 30,41,950 | 1,33,041 |
| బ్రెజిల్ | 16,28,283 | 65,631 |
| రష్యా | 6,94,230 | 10,494 |
| పెరు | 3,05,703 | 10,772 |
| స్పెయిన్ | 2,98,869 | 28,388 |
