భారత్‌ 74వ స్వాతంత్ర్య దినోత్సవాన్ని పురస్కరించుకొని అమెరికాలోని సిలికానాంధ్ర తెలుగు సంఘం వారి ఆధ్వర్యంలో శనివారం జూమ్‌ వేదికగా.. లక్ష గొంతుకలతో హనుమాన్ చాలీసా పారాయణం ఆలపించారు. ఈ కార్యక్రమానికి సుమారు 50 దేశాల్లో నివసిస్తున్న ప్రవాస భారతీయులు పాల్గొన్నారు. చిన్నా, పెద్దా తేడాలేకుండా అందరూ గొంతు కలిపి ఈ అద్భుత కార్యక్రమంలో పాలుపంచుకున్నారు. ఇంతమంది ఒకేసారి హనుమాన్ చాలీసా పారాయణం చేయడం గొప్ప విశేషమే కాకుండా సాంకేతికంగానూ మహత్కార్యమని నిర్వాహకులు తెలిపారు.
'హనుమంతుని శక్తి ప్రజలకు కావాలి'
ప్రపంచంలో ప్రస్తుతం నెలకొన్న కొవిడ్-19 మహమ్మారిని ఎదుర్కొనేందుకు ప్రజలందరికీ మనో బలంతో పాటు సామాజిక స్థైర్యం, శాంతి నెలకొనాలని వారి ఆశించారు. ఈ కార్యక్రమంలో పాల్గొన్న కేంద్ర జలశక్తి శాఖ మంత్రి గజేంద్ర సింగ్ షెఖావత్.. త్వరలోనే ఈ ప్రపంచం కరోనా నుంచి బయట పడాలని ఆకాంక్షించారు. హనుమంతుడికి బుద్ధి, బలం, పరాక్రమం కలగలసిన శక్తి ఉందని, అది ప్రజలందరికీ కావాలని ఆయన కోరారు.
కరోనాను జయించాలని..
ఈ కార్యక్రమం ద్వారా దైవ, మానవ శక్తి కలగలిసి మహా చైతన్యంగా ఏర్పడి.. కరోనాపై విజయం సాధించాలని సంస్థ సభ్యులు అభిలషించారు. సిలికానాంధ్ర భారత సనాతన ధర్మాన్ని భావితరాలకి అందిస్తోందని, అలాగే ఇలాంటి గొప్ప కార్యక్రమాన్ని సంకల్పించడం విశేషమని ఈ కార్యక్రమంలో పాల్గొన్న పలువురు ప్రముఖులు కొనియాడారు. రామ నామం స్మరించడం మంచిదని, అది రాళ్ళనైన తేలిక చేసి సముద్రంలో వారథినైనా నిర్మిస్తుందని వారు చెప్పారు. తద్వారా ప్రజా సమస్యల కోసం రాముడి నామం జపించి కరోనాని జయిద్దామని అన్నారు.
గిన్నిస్ రికార్డ్..
లక్ష మందికి పైగా పాల్గొన్న ఈ కార్యక్రమం గిన్నీస్ బుక్ ఆఫ్ వరల్డ్ రికార్డ్స్‌లో చోటు దక్కించుకుంది. కూచిభొట్ల ఆనంద్‌ నేతృత్వంలో నిర్వహించిన ఈ బృహత్కార్యంలో సిలికానాంధ్ర సభ్యులు దిలీప్ కొండిపర్తి, రాజు చామర్తి, మధుబాబు ప్రఖ్య, ప్రియ తనుగుల, సాయి కందుల, జ్యోతి చింతలపూడి, స్నేహ వేదుల తదితరులు పాల్గొన్నారు.
ఇదీ చదవండి: ఎల్లలు దాటిన 'స్వాతంత్ర్య' భారత సంబరం!
