Omicron Scare in America: కరోనా కొత్త వేరియంట్ ఒమిక్రాన్ ప్రపంచ దేశాలను కలవరపెడుతోంది. తొలుత దక్షిణాఫ్రికాలో బయటపడ్డ ఈ రకం.. డిసెంబర్ 1న అమెరికాలోకి ప్రవేశించింది. కాలిఫోర్నియాలో ఒక ఒమిక్రాన్ కేసు నమోదైంది.
ఒమిక్రాన్ వ్యాప్తి నేపథ్యంలో వైరస్ కట్టడికి అమెరికా అధ్యక్షుడు జో బైడెన్ కఠిన నిర్ణయాలే తీసుకుంటున్నారు. శీతాకాలంలో.. ఇంట్లో ఉన్నవారిలోనూ వైరస్ వ్యాప్తి చెందే అవకాశాలు ఎక్కువగా ఉంటాయన్న నేపథ్యంలో కొత్త మార్గదర్శకాలు రూపొందించారు. విదేశాల నుంచి తిరిగొచ్చే అమెరికన్లకు వీటి వల్ల ఇబ్బందులు తప్పకపోవచ్చు. వచ్చే వారంలో ఈ కొత్త నిబంధనలు అమలవుతాయి. వీటి ప్రకారం..
- అమెరికా బయల్దేరడానికి ఒక్కరోజు ముందు చేయించుకున్న కొవిడ్ పరీక్షనే పరిగణనలోకి తీసుకుంటారు. గతంలో ఇది 3 రోజుల వరకు చెల్లుబాటు అయ్యేది. ఇందులో నెగెటివ్‌ వచ్చినట్టు ప్రయాణికులు ధ్రువపత్రం/ఆధారాలను చూపించాలి.
- జాతి, వ్యాక్సినేషన్‌తో సంబంధం లేకుండా అమెరికన్లు సహా ప్రయాణికులందరికీ ఇది వర్తిస్తుంది.
- విమానాలు, రైళ్లు, బస్సుల్లో ప్రయాణించేవారు తప్పనిసరిగా మాస్కులను ధరించాలి. జనవరితో ముగిసే ఈ నిబంధన గడువును పొడిగిస్తారు.
- ప్రజారవాణా, పబ్లిక్‌ స్థలాల్లో మాస్కు ధరించని వారికి రూ.37 వేల నుంచి రూ.2.25 లక్షల (500-3,000 డాలర్ల) వరకు జరిమానా విధిస్తారు.
- విదేశాల నుంచి అమెరికా చేరుకున్న అంతర్జాతీయ ప్రయాణికులకు కొవిడ్ పరీక్షలు నిర్వహించాలి. నెగెటివ్‌ వచ్చినా కొద్దిరోజులు క్వారంటైన్‌లో ఉండాలి.
- ప్రయాణికులు వారి కాంటాక్ట్ ట్రేసింగ్ సమాచారాన్ని కూడా సమర్పించాల్సి ఉంటుంది. ఇందులో వ్యక్తుల పేర్లు, చిరునామా, ఫోన్ నెంబర్లు, మెయిల్, పుట్టిన తేదీ వంటి వివరాలు ఉండాలి.
- దక్షిణాఫ్రికా సహా ఏడు ఆఫ్రికా దేశాల ప్రయాణికులపై ఇప్పటికే నిషేధం విధించింది అమెరికా ప్రభుత్వం.
- అమెరికా పౌరులు, శాశ్వత నివాసితులకు ఇందులో మినహాయింపు ఉంటుంది.
- ఒమిక్రాన్ వేరియంట్పై శాస్త్రవేత్తలు ఇంకా అధ్యయనం చేస్తున్నందున.. కఠిన నిబంధనలు అదనపు రక్షణ కల్పిస్తాయని చెప్పారు బైడెన్.
Joe Biden On Omicron:
కొత్తగా పుట్టుకొచ్చిన కరోనా వేరియంట్ ఒమిక్రాన్ను కట్టడి చేసేందుకు సిద్ధంగా ఉన్నామని బైడెన్ ప్రకటించారు. ఈ మేరకు మహమ్మారిపై ఎలా పోరాడాలో వివరిస్తూ.. ప్రత్యేక వ్యూహాన్ని తయారుచేయనున్నట్లు తెలిపారు. ఈ వేరియంట్ను చూసి భయం, కంగారు పడొద్దని ప్రజలకు సూచించారు.
ఈ పూర్తి వార్త కోసం ఇక్కడ క్లిక్ చేయండి.
ఇవీ చూడండి: తొలుత ఎలుకల్లో ఒమిక్రాన్.. ఆ తర్వాతే మనుషులకు!
Omicron Variant : ఒమిక్రాన్పై ప్రస్తుతమున్న టీకాలు పనిచేస్తాయా?
